मुंबई : अदानी समूहातील गुंतवणूकदारांवर झालेल्या कारवाईने भांडवली बाजारात ढवळून निघालेले वातावरण हळूहळु निवळत आहे. आज मंगळवारी सेन्सेक्स आणि निफ्टीने तेजीने सुरुवात केली आहे. सोमवारच्या पडझडतीतून अदानी समूहाचे शेअर सावरले आहेत. अदानी समूहाच्या विविध शेअरमध्ये वाढ झाली आहे. सध्या मुंबई शेअर बाजाराचा सेन्सेक्स २६५ अंकांनी वधारला असून तो ५२८१२ अंकावर आहे. राष्ट्रीय शेअर बाजाराचा ६७ अंकांनी वधारला आणि तो १५८७८ अंकावर आहे. दोन्ही निर्देशांक सध्या सार्वकालीन उच्चांकी स्तरावर आहेत. आजच्या सत्रात अदानी पोर्ट, अदानी ग्रीन , अदानी एन्टरप्रायजेस या शेअरमध्ये वाढ झाली आहे. धातू, बँक, वित्तीय संस्था या क्षेत्रात खरेदीचा ओघ आहे. मिडकॅप आणि स्मॉल कॅपला देखील आज मागणी आहे. सेन्सेक्सच्या ३० पैकी २९ शेअरमध्ये वाढ झाली आहे. ज्यात इंडसइंड बँक, एशियन पेंट, कोटक बँक, भारती एअरटेल, बजाज फायनान्स, ओएनजीसी, एसबीआय, बजाज ऑटो, टीसीएस, आयटीसी, एक्सिस बँक, एचडीएफसी, रिलायन्स या शेअरमध्ये वाढ झाली आहे. रियल्टी, मेटल्स आणि प्रायव्हेट बँक इंडेक्सवर काल परिणाम दिसून आला.निफ्टी आयटी आणि निफ्टी पीएसयू बँक इंडेक्स आपली आघाडी कायम रखण्यात यशस्वी झाले.निफ्टी-५० मधील ५० पैकी २५ शेअर तेजीसह बंद झाले. टाटा मोटर्स, रिलायन्स, विप्रो एक टक्क्यांपेक्षा जास्त आघाडीसह टॉपवर राहिले आणि अदानी पोर्ट्स, कोल इंडिया आणि कोटक बँक या शेअरमध्ये घसरण झाली होती. सोमवारच्या सत्रात डीएलएफ आणि बीएचईएल शेअर्स अनुक्रमे ३ टक्के आणि ११ टक्क्यांपेक्षा जास्त कोसळले. ही घसरण त्यांच्या चौथ्या तिमाहीच्या कारणाने झाली. हे निकाल शुक्रवारी संध्याकाळी उशिरा जाहीर करण्यात आले होते. त्या व्यतिरिक्त, अदाणी समूहाचे सर्व सहा सूचीबद्ध कंपन्यांचे शेअर्स एका रिपोर्टनंतर दडपणाखाली आले होते आणि नॅशनल सिक्योरिटीज डिपॉझिटरी लिमिटेडने या समुहाच्या चार कंपन्यांमध्ये हिस्सा ठेवणार्या तीन विदेशी फण्ड्सची खाती गोठवून टाकली. अदानी पोर्ट्स आणि अदानी एंटरप्राइझेस हे दोन्ही इंट्राडेमध्ये २० टक्क्यांपेक्षा जास्त गडगडले. जागतिक आघाडीवर अमेरिकन बेंचमार्क निर्देशांक शुक्रवारच्या सत्राच्या तुलनेत जेमतेम थोड्याशा वाढीने बंद झाले, ज्यात एसअँडपी ५०० एका नवीन विक्रमी स्तरावर पोहोचला आणि टेक हेवी नॅस्डेक एक महिन्याच्या आपल्या सर्वोत्तम स्तरावर पोहोचला. नॅसडॅकमध्ये १.८ टक्के आणि एसअँडपी ५०० मध्ये ०.४ टक्के वाढ झाली. डाउमध्ये ०.८ टक्के घसरण झाली. तीन मुख्य निर्देशांकांचे फ्यूचर्स फ्लॅट नोटवर कारभार करत होते तर डाउ जोन्स फ्यूचर्स ०.११ टक्के खाली, नॅस्डेक फ्यूचर्स ०.३० टक्के आणि एसअँडपी ५०० फ्यूचर्स ०.०२ टक्के वर होते.
