म. टा. विशेष प्रतिनिधी, मुंबईमध्ये येथे बुधवारी (२८ जुलै) सकाळी १ जानेवारीपासूनच्या पावसाने वर्षभरातील पावसाची सरासरी ओलांडली. सांताक्रूझ येथे २३२ सेंटीमीटर पाऊस वर्षभरात पडतो. बुधवारी सकाळी सांताक्रूझ येथे २३२.७३ सेंटीमीटर पावसाची नोंद झाली. पावसाळ्याचे आणखी दोन महिने शिल्लक असतानाच जून आणि जुलैमध्ये टप्प्याटप्प्यांमध्ये झालेल्या विक्रमी पावसामुळे जूनमध्येच वार्षिक सरासरी ओलांडली आहे. कुलाबा येथे मात्र वार्षिक सरासरीचा टप्पा गाठण्यास अवकाश आहे. सांताक्रूझ येथे बुधवारी सकाळी संपलेल्या २४ तासांमध्ये केवळ १४ मिलीमीटर पावसाची नोंद झाली. त्यामुळे वार्षिक सरासरीचा टप्पाही मुंबईने ओलांडला. यंदा पावसाने फारशी उसंतच घेतलेली नव्हती. त्यामुळे सातत्याने मुंबईच्या पावसाने यंदा नवनवीन विक्रम नोंदवले. १ जूनपासून २८ जुलैपर्यंत २०७ सेंटीमीटर पाऊस झाला आहे. संपूर्ण पावसाळ्यात सांताक्रूझ येथे २२०.५८ सेंटीमीटर पाऊस नोंदवला जातो. यंदाच्या पावसाळ्याची सरासरी आकडेवारी गाठायला आणखी १३ सेंटीमीटर पावसाची आवश्यकता आहे. गेल्या आठवड्यातील पावसानंतर सध्या पावसाचे प्रमाण अगदीच तुरळक झाले आहे. त्यामुळे मुंबईकरांनीही निःश्वास सोडला आहे. मात्र पाऊसमानाची वाढती आकडेवारी धडकी भरवणारी असल्याच्या प्रतिक्रिया उमटत आहेत. जुलै महिन्यामध्ये आत्तापर्यंत १,१०९.५ मिलीमीटर पावसाची नोंद झाली आहे. गेल्या वर्षी ऑगस्टच्या पहिल्या आठवड्यामध्ये पावसाळ्याच्या काळातील नोंदीने २,००० मिलीमीटरचा टप्पा सांताक्रूझ येथे ओलांडला होता; तर मुंबईतील एकूण पावसाने ३,५०० मिलीमीटर टप्पा ओलांडला होता. सन २०१९ मध्येही ऑगस्टच्या पहिल्या आठवड्यात २,००० मिलीमीटरचा टप्पा ओलांडला होता आणि पावसाळ्याच्या काळातील एकूण पावसाने ३,५०० मिलीमीटरचा टप्पा ओलांडला होता. सन २०१८ मध्ये मात्र १५ ऑगस्टनंतर २,००० मिलीमीटरचा टप्पा ओलांडला आणि नंतरच्या कालावधीत फारसा पाऊस न पडल्याने एकूण पाऊस २,५०० मिलीमीटरपेक्षा कमी होता. जुलैचा आलेख आणखी उंचावणार? बुधवार सकाळपर्यंत कुलाबा येथे १ जूनपासून १५०.७६ सेंटीमीटर पाऊस पडला आहे. पावसाळ्यात कुलाबा येथे २०२ सेंटीमीटर पावसाची सरासरी नोंद होते. त्यामुळे शहरातील पावसाचा टप्पा गाठण्यासाठी आणखी किमान ५२ सेंटीमीटर पावसाची गरज आहे. ३० आणि ३१ जुलै या दोन्ही दिवसांसाठी प्रादेशिक हवामान विभागाने तुरळक ठिकाणी मुसळधार पावसाचा इशारा दिला आहे. त्यानंतर जुलै महिन्याचा पावसाचा आलेख आणखी उंचावण्याची शक्यता आहे.
