मुंबई- बॉलिवूड अभिनेता सलमान खानला मुंबई विमानतळावर थांबवणारे CISF चे ASI रातोरात सोशल मीडियावर 'हिरो' झाले. पण आता याचमुळे ते अडचणीत सापडणार आहेत. त्याचं झालं असं की, सोमनाथ यांनी सलमानला विमानतळावर थांबवून आपले कर्तव्य तर निभावले पण नंतर त्यांच्यावर प्रोटोकॉल मोडल्याचा आरोप झाला. मीडिया रिपोर्टनुसार, सलमानला थांबवल्यानंतर सीआयएसएफने सोमनाथ यांचा मोबाइल फोन जप्त केला. प्रसारमाध्यमांशी बोलल्यामुळे त्यांचा मोबाइल जप्त करण्यात आला आहे. कारण हे प्रोटोकॉलचे उल्लंघन आहे. सीआयएसएफच्या एका अधिकाऱ्याने सांगितले की त्यांचा मोबाइल फोन यासाठी जप्त करण्यात आला आहे की जेणेकरून तो या घटनेसंबंधी मीडियाशी अधिक बोलू शकणार नाही. आपल्या आगामी सिनेमाच्या चित्रीकरणासाठी रशियाला रवाना होण्यासाठी मुंबई विमानतळावर पोहोचला होता. सोशल मीडियावर समोर आलेल्या व्हिडिओमध्ये तुम्ही पाहू शकता की, जेव्हा सलमान खान विमानतळावर पोहचला तेव्हा तिथे उपस्थित असलेल्या छायाचित्रकारांनी आणि इतर लोकांनी घेरले होते. यानंतर तो आपल्या सुरक्षारक्षकांसह विमानतळाच्या आत जाऊ लागला. दरम्यान, सीआयएसएफचे एएसआय सोमनाथ मोहंती यांनी सलमानला सुरक्षा तपासणीशिवाय आत जाण्यापासून रोखलेय यानंतर अभिनेता संपूर्ण तपास पूर्ण होईपर्यंत विमानतळाच्या दारावरच थांबला. सलमान खानला विमानतळावर थांबवल्याचा व्हिडिओ सोशल मीडियावर समोर आल्यानंतर युझर्स सीआयएसएफ चे एएसआय सोमनाथ मोहंती यांचे कौतुक करत होते. सलमान खान सेलिब्रिटी असूनही सोमनाथ मोहंतीने आपले कर्तव्य बजावले यासाठी प्रत्येकजण त्यांचे गोडवे गात होता. 'टायगर ३' सिनेमात सलमान खान रॉ एजंटची भूमिका साकारताना दिसणार आहे. तर कतरिना कैफ आयएसआयची एजंट बनली आहे. टायगर सीरिजचा पहिला सिनेमा होता 'एक था टायगर' आणि दुसरा सिनेमा होता 'टायगर जिंदा है'. आता 'टायगर ३' मध्ये इम्रान हाश्मी खलनायकाच्या भूमिकेत दिसणार आहे.
