नवी दिल्ली : संपूर्ण देश भालाफेकपटू नीरज चोप्राच्या विजयाचा आनंद साजरा करत असेल, पण हे सुवर्ण पदक एकट्या नीरजचं नाही. या विजयामागे अनेक लोकांची मेहनत आहे. यामध्ये आघाडीवर नाव येतं ते नीरजचे प्रशिक्षक डॉ. क्लॉस बार्टोनिट्झ () यांचं. 2019 मध्ये क्लॉस नीरजचे प्रशिक्षक बनले आणि दोन वर्षांच्या आत त्यांनी भारताला पहिला सुवर्ण पदक विजेता खेळाडू दिला. क्लॉस बार्टोनिट्झ हे बायोमेकॅनिक्स तज्ज्ञ देखील आहेत. 73 वर्षीय या माजी खेळाडूने अनेकांना प्रशिक्षण दिले ज्यामध्ये दिग्गज खेळाडू जोहानस वेट्टरच्या प्रशिक्षकांचाही समावेश आहे. क्लॉसने नीरजला प्रशिक्षित करण्यासाठी अनेक ठिकाणांहून प्रेरणा घेतली. यासर्वांमध्ये मार्शल आर्ट तज्ज्ञ ब्रूस ली यांचाही समावेश आहे. डॉ. क्लॉस यांनी ब्रूस ली कडून घेतली प्रेरणा इंडियन एक्स्प्रेसशी बोलताना क्लॉस म्हणाले की, 'ब्रूस लीने सांगितलेली एक गोष्ट मला खरोखरच आवडली, जी भाला फेकसाठी अत्यंत चपखल बसते. ते म्हणतात की, पायांपासून कंबर आणि हातांपर्यंत ताकद आणावी. आणि हेच भालाफेकमध्ये करायचे आहे. तुम्ही उडी मारून भाला फेकू शकत नाही. हे शॉटपुटमध्ये काम करू शकते, भालाफेकमध्ये नाही. भालाफेकमध्ये तुम्हाला जमिनीशी जोडल्यासारखे राहावे लागते, तरच तुम्ही धनुष्यासारखे वाकू शकता. नीरजच्या शरीरातील दुर्बलतेवर केलं काम क्लॉसने स्पष्ट केले की, भालाफेकसाठी खेळाडूचे शरीर धनुष्यासारखे व्हावे लागले. आणि भाला हा बाणासारखा असतो. शरीर एखाद्या इलॅस्टिकसारखे असते, जे ताणल्यानंतर ऊर्जा उत्पन्न होते आणि ती भाला फेकण्यासाठी वापरली जाते. अंतिम फेरीत नीरज सर्वात वेगवान होता, कारण त्याचा रनअप सर्वात चांगला होता. नीरजचे शरीर आणखी ढिले करण्यासाठी क्लॉस त्याच्याकडून वेगवेगळ्या प्रकारचे व्यायाम करवून घ्यायचा. भालाफेकीत फक्त ताकदच महत्त्वाची नाही, तर खेळाडूचे शरीर किती ढिले आणि लवचिक आहे, हेदेखील महत्त्वाचे ठरते. नीरजने अंतिम सामन्यात सुरवातीलाच चांगली छाप पाडली होती, त्यामुळे बाकीच्यांवर आपोआप दबाव आला होता. त्याचे थ्रो इतर खेळाडूंपेक्षा चांगले पडल्याने पहिला आला.
