म. टा. विशेष प्रतिनिधी, मुंबई अभिनेता याचा मित्र याला अमलीपदार्थ प्रकरणात जामीन दिलासा देण्याचा विशेष एनडीपीएस न्यायालयाने बुधवारी नकार दिला. यापूर्वीही न्यायालयाने त्याचा जामीन अर्ज फेटाळला होता. सिद्धार्थला एनसीबीच्या अधिकाऱ्यांनी मे महिन्यात अटक केली होती. अमलीपदार्थांच्या व्यवहारात सहभागी असल्याविषयी आपल्याविरुद्ध कोणताही पुरावा नाही, असा दावा करत त्याने मागील महिन्यात जामिनासाठी अर्ज केला होता. 'एनसीबीच्या अधिकाऱ्यांनी सुशांतसिंहच्या घराचा व्यवस्थापक व स्वयंपाक्याच्या जबाबांच्या आधारे मला अटक केली. मात्र, या दोघांनी आपल्या जबाबांविषयी नंतर घूमजाव केले आहे. शिवाय मी फरार झालो होतो, हा एनसीबीचा दावा खोटा असून सुशांतच्या मृत्यू प्रकरणाच्या तपासात मी सीबीआय व ईडीच्या अधिकाऱ्यांना गेल्या वर्षी जून ते सप्टेंबरदरम्यान पूर्ण सहकार्य केले. त्यानंतर मी माझ्या हैदराबादमधील घरी गेलो होतो. या प्रकरणात ज्यांच्याकडून अमलीपदार्थ हस्तगत करण्यात आले आहे, असे सर्व जण जामिनावर आहेत. त्यामुळे मलाही जामीन देण्यात यावा', असा युक्तिवाद सिद्धार्थने केला होता. तर 'सिद्धार्थविरोधातील तपास अद्याप पूर्ण होऊन आरोपपत्रही दाखल करायचे आहे. सिद्धार्थ हा सुशांतसिंहच्या घरी अमलीपदार्थांचे सेवन करायचा आणि त्यांची व्यवस्थाही करायचा. त्याविषयीचे आर्थिक व्यवहारही आहेत, असे दाखवणारे पुरावे आहेत. त्याच्या मोबाईलधून याविषयीचे अनेक पुरावे मिळाले आहेत. सुशांतसिंहचा सुरक्षारक्षक, स्वयंपाकी व घराचा व्यवस्थापक यांच्या जबाबांमधूनही पुरावे मिळाले आहेत', असा युक्तिवाद एनसीबीतर्फे मांडण्यात आला. अखेर एनसीबीचा युक्तिवाद ग्राह्य धरत न्यायालयाने सिद्धार्थचा जामीन अर्ज फेटाळून लावला.
