मुंबई : बनावट पावत्या जारी करुन ई-वे बिल करणाऱ्या राज्यातील एका बड्या पोलाद उत्पादक कंपनीवर आयकर विभागाने नुकताच कारवाई केली. आयकर विभागाने बुधवारी महाराष्ट्र आणि गोवा येथील उद्योग समूहाशी संबंधित ठिकाणांवर छापे टाकत जप्तीची कारवाई केली. यात १७५ कोटींचा काळा पैसा आढळून आला आहे. हा उद्योग समूह पुणे, नाशिक, अहमदनगर आणि गोवा येथील एक नामांकित पोलाद उत्पादक आणि व्यापारी आहे. ४४ हून अधिक ठिकाणी छापे टाकण्यात आले. या मोहिमेदरम्यान आक्षेपार्ह कागदपत्रे, दस्तऐवजांचे कागद आणि डिजिटल पुरावे जप्त करण्यात आले. छापे टाकून केलेल्या कारवाई दरम्यान सापडलेल्या पुराव्यांमुळे हे उघड झाले आहे की, हा समूह 'बनावट पावत्या जारी करणाऱ्यांकडून भंगाराची आणि स्पंज आयर्नची खरेदी करण्याच्या फसवणुकीच्या प्रकारांमध्ये गुंतला होता. या कारवाई दरम्यान बनावट पावत्या जारी करणाऱ्यांच्या ठिकाणांवरही छापे टाकण्यात आले. अशा पावत्या देणाऱ्यांनी कबूल केले आहे की, त्यांनी केवळ देयके पुरवली मात्र ज्याची देयके होती ते साहित्य पुरवलेले नाही. खरोखर खरेदी केल्याचे दाखविण्यासाठी आणि जीएसटी इनपुट क्रेडीटचा दावा करण्यासाठी बनावट ई-वे देयके देखील निर्माण करण्यात आली. पुण्याच्या जीएसटी प्राधिकरणाच्या पाठिंब्याने, बनावट ई-वे देयके ओळखण्यासाठी "व्हेईकल मुव्हमेंट ट्रॅकिंग अॅप" चा वापर करण्यात आला.या समूहाने दाखवलेली एकूण बनावट खरेदी, आतापर्यंत सुमारे १७५ कोटी रुपयांची असल्याचे निष्पन्न झाले आहे. विविध ठिकाणांवरून तीन कोटी रुपयांची बेहिशेबी रोकड आणि ५.२० कोटी रुपयांचे दागिने जप्त करण्यात आले आहेत. त्याशिवाय १९४ किलो चांदीच्या बेहिशेबी वस्तूंही जप्त करण्यात आल्या आहेत. याचे मूल्य १.३४ कोटी रुपये आहे. करपात्र व्यक्तीने हे स्वीकारले असून हे अतिरिक्त उत्पन्न म्हणून घोषित केले आहे. या कारवाई दरम्यान आतापर्यंत, बेहिशेबी रोकड आणि दागिने, कमी आणि अतिरिक्त साठा आणि बोगस खरेदी यांचा समावेश असलेले १७५.५ कोटी रुपयांचे बेहिशेबी उत्पन्न आढळून असल्याचे आयकर विभागाने म्हटलं आहे.
