नवी दिल्ली : भारताचा सलामीवीर लोकेश राहुलने दुसऱ्या कसोटी सामन्यात शतक झळकावले. या शतकासह राहुलने भारताचे प्रशिक्षक रवी शास्त्री यांचाच विक्रम आता मोडीत काढला आहे. राहुलने नेमका कोणता विक्रम मोडीत काढला, पाहा...रोहित शर्माचे शतक १७ धावांनी हुकले असले तरी राहुलने मात्र या सामन्यात शतक झळकावले. लॉर्ड्सवरचे त्याचे हे पहिले शतक ठरले आहे. त्याचबरोबर राहुलने या शतकासह रवी शास्त्री यांचा विक्रमही मोडीत काढला आहे. शास्त्री यांनी १९९० साली भारताच्या सलामीवीराचा भूमिका बजावली होती. या सामन्यात शास्त्री यांनी १०० धावांची खेळी साकारली होती. पण आता राहुलने शतक झळकावत तब्बल ३१ वर्षांनी लॉर्ड्सवर सलामीवीर म्हणून शतक झळकावण्याचा पराक्रम केला आहे. राहुल आणि रोहितने मोडला ६९ वर्षांपूर्वीचा विक्रम...रोहितला यावेळी शतक झळकावता आले नसले तरी त्याने राहुलबरोबर दमदार सलामी देताना मोठा विक्रम मोडीत काढला आहे. लॉर्ड्सच्या मैदानात १९५२ साली विनू मंकड आणि पंकज रॉय यांनी १०६ धावांची सलामी दिली होती. त्यानंतर आतापर्यंत भारताच्या एकाही सलामीच्या जोडीला हा विक्रम मोडता आला नव्हता. पण रोहित आणि राहुल यांनी आज १२६ धावांची सलामी देत हा विक्रम मोडीत काढला आहे. लॉर्ड्सवर भारतीय सर्वाधिक भागीदारीचा विक्रम हा सुनील गावस्कर आणि फारुख इंजिनीअर यांच्या नावावर अजूनही अबाधित आहे. या दोघांनी १३१ धावांची भागीदारी रचली होती, त्यासाठी रोहित आणि राहुल यांना फक्त पाच धाला कमी पडल्या. पण या मैदानात सर्वाधिक सलामी देणाऱ्या भारतीय जोडीचा विक्रम मात्र आता रोहित आणि राहुल यांच्या नावावर झाला आहे. रोहितने २०२१ या वर्षात सर्वाधिक धावा करण्याचा विक्रम आपल्या नावावर केला आहे. भारतीय संघ २०२१ या वर्षात जेवढ्या कसोटी लढती खेळल्या आहे, त्यामध्ये सर्वाधिक धावसंख्या ही रोहित शर्माची आहे. रोहितने या वर्षी झालेल्या कसोटी सामन्यांमध्ये ६००पेक्षा जास्त धावा केल्या असून ही गोष्ट आतापर्यंत भारताच्या एकाही फलंदाजाला जमलेली नाही. त्यामुळे लॉर्ड्सच्या ऐतिहासिक क्रिकेट मैदानात रोहितने या विक्रमाला गवसणी घातली आहे.
