म. टा. प्रतिनिधी, राज्याचे माजी गृहमंत्री अनिल देशमुख यांच्यावर करण्यात आलेल्या १०० कोटी रुपयांच्या खंडणीच्या आरोपांसंदर्भात परिवहन मंत्री अनिल परब यांची सक्तवसुली संचालनालयाने (ईडी) मंगळवारी जवळपास आठ तास चौकशी केली. तत्कालीन गृहमंत्री अनिल देशमुख यांनी खंडणी मागितल्याच्या आरोपांचा 'ईडी'कडून तपास सुरू आहे. यामधील प्रमुख आरोपी सचिन वाझे याने जानेवारी महिन्यातील एका पत्रात, अनिल परब यांनी मुंबईतील ५० कंत्राटदारांकडून प्रत्येकी २ कोटी रुपये खंडणी वसुलीचे लक्ष्य दिले होते, असा आरोप केला आहे. त्या पार्श्वभूमीवर वाझे याची 'ईडी'ने दोन वेळा कसून चौकशी केली. तसेच या प्रकरणी अन्य काही आरोपींचीदेखील चौकशी करण्यात आली आहे. या सगळ्यांच्या चौकशीत मिळालेल्या माहितीच्या आधारे 'ईडी'ने शनिवारी परब यांना दुसऱ्यांदा चौकशीचे समन्स बजावले होते. त्यानुसार मंगळवारी परब यांची चौकशी झाली. 'ईडी' तील सूत्रांनी सांगितले की, 'अनिल देशमुख यांच्या १०० कोटी रुपये खंडणी प्रकरणात वाझे हा मुख्य आरोपी आहे. त्यामध्ये वाझे व अन्य आरोपींनी महत्त्वाची माहिती ईडीला दिली आहे. त्या माहितीसंबंधीच परब यांची चौकशी करण्यात आली. परब यांना खरेच खंडणी मिळाली का, याचा तपास करण्यासाठी ही चौकशी झाली. परंतु अद्याप तपास संपलेला नाही.' अनिल परब हे सकाळी ११ वाजता 'ईडी' च्या बॅलार्ड पीयर येथील क्षेत्रीय कार्यालयात पोहोचले. सायंकाळी ७ वाजल्यानंतर त्यांना कार्यालयातून जाऊ दिले गेले. 'मी ईडीच्या सर्व प्रश्नांची उत्तरे दिली. तपास संस्थेला पूर्ण सहकार्य करीत आहे. परंतु मी काहीही चुकीचे केले नसताना नेमकी चौकशी का होत आहे, हे माहीत नाही', असे परब यांनी चौकशीनंतर सायंकाळी 'ईडी' च्या कार्यालयाबाहेत आल्यानंतर पत्रकारांना सांगितले.
