म. टा. विशेष प्रतिनिधी, मलेरिया, डेंग्यूच्या रुग्णसंख्येचा ताप या महिन्यामध्ये वाढलेला दिसत असताना चिकनगुनियाच्या पाच रुग्णांचीही नोंद मुंबईमध्ये झालेली दिसते. २०१९ तसेच २०२० या दोन्ही वर्षांमध्ये सप्टेंबरमध्ये पालिकेच्या आरोग्य विभागाकडे चिकनगुनियाच्या एकाही रुग्णाची नोंद झाली नव्हती. एकीकडे करोना संसर्ग कमी होत असताना पावसाळी आजारांचा ताप मुंबईमध्ये वाढताना दिसतो. जानेवारी ते सप्टेंबरदरम्यान डेंग्यूमुळे तीन तर लेप्टोस्पायरोसिसमुळे चार जणांचा बळी गेला आहे. २६ सप्टेंबरपर्यंत मुंबईत मलेरियाच्या ५५०, लेप्टोच्या ३२, डेंग्यूच्या १९८, गॅस्ट्रोच्या २०९, कावीळच्या २६, चिकनगुनियाच्या पाच व स्वाइन फ्लूच्या आठ रुग्णांची नोंद करण्यात आली आहे. मात्र या आजारांमुळे मुंबईमध्ये एकाही रुग्णाच्या मृत्यूंची नोंद झालेली नाही. श्वास घ्यायला त्रास होत असल्यामुळे ३१ जुलै रोजी अठरा वर्षांच्या तरुणाला रुग्णालयामध्ये दाखल करण्यात आले होते. त्याच्या शरीरात प्लेटलेट कमी होत्या. डेंग्यूमुळे या तरुणाचा १ ऑगस्ट रोजी मृत्यू झाला. ४४ वर्षीय महिला रुग्णाला अंगदुखी, ताप येणे या कारणांसाठी १५ ऑगस्ट रोजी रुग्णालयात दाखल करण्यात आले होते. या महिलेला उच्चरक्तदाब आणि यकृताशी निगडित आजार होते. श्वसनविकारासह डेंग्यू तसेच किडनीचे कार्य बिघडल्यामुळे या महिलेचा मृत्यू झाला. मृतांमध्ये पाच महिन्यांच्या एका मुलीचाही समावेश आहे. एम पूर्वेकडील प्रभागामध्ये राहणाऱ्या या बाळाला २७ तारखेला खूप ताप येत असल्यामुळे रुग्णालयात दाखल करण्यात आले. अॅनेमियासह प्लेटलेटची संख्याही कमी झाली होती, विविध प्रकारच्या संसर्गाची लागण होऊन डेंग्यूमुळे या मुलीचा मृत्यू झाला. एफ उत्तर प्रभागात राहणाऱ्या दहा वर्षीय मुलाला तर आणि के पूर्व प्रभागामध्ये राहणाऱ्या ४५ वर्ष व्यक्तीला व्यक्तीला लेप्टोस्पायरोसिमुळे जीव गमावावा लागला आहे. अशी आहे स्थिती (जानेवारी ते २६ सप्टेंबर) आजार - रुग्णसंख्या - मृत्यू मलेरिया - ३९४६ ० लेप्टो - १६५ - ४ डेंग्यू- ४१८ -३ गॅस्ट्रो - २०८१ ० कावीळ - १९१ ० चिकनगुनिया - ५ ० स्वाइन फ्लू - ५४ ०
