म. टा. विशेष प्रतिनिधी आणि त्याच्याशी निगडित आरोग्यविषयक समस्यांमध्ये सध्या वाढ झाली असून, यातील तरुणांची संख्या जवळपास ३० ते ४० टक्क्यांनी वाढल्याचे समोर येत आहे. यासंदर्भात सातत्याने जनजागृती करण्यात येत असली, तरीही तरुणांमध्ये हृदयासंदर्भात पूर्व वैद्यकीय तपासण्या करण्याचे प्रमाण अतिशय कमी असल्याचे दिसून येते. परंतु, कर्करोगाप्रमाणेच या व्याधीकडे अधिक गंभीरपणे पाहायला हवे, हृदयाचे आरोग्य सक्षम ठेवण्यासाठी सातत्याने प्रयत्नशील राहायला हवे, याकडे वैद्यकीय तज्ज्ञांनी आजच्या जागतिक हृदयदिनानिमित्त पुन्हा एकदा लक्ष वेधले आहे. योग्य वेळी केलेल्या निदानामुळे वैद्यकीय उपचार वेळेत सुरू करून हृदयाचा आजार बळावण्यापूर्वी त्यावर मात करता येते, असे डॉक्टर सांगत आहेत. इंटर्नल मेडिसीन तज्ज्ञ डॉ. तुषार राणे म्हणाले, की 'आता हृदयाच्या समस्या केवळ वृद्ध व्यक्तींपुरता मर्यादित नाहीत. कमी वयोगटातील व्यक्तीही हृदयविकाराला बळी पडत आहेत. यामध्ये २५ ते ४० या वयोगटातील तरुणांची संख्या जवळजवळ ३० ते ४० टक्क्यांनी वाढली आहे. कोविड -१९ मुळे जीवनशैलीत झालेले बदल आणि आरोग्यावर होणाऱ्या दुष्परिणामांमुळे रुग्णांमधील हृदयाच्या कार्यात अडथळे निर्माण होतात.' इंटरव्हेशनल कार्डिओलॉजिस्ट डॉ. चेतन शहा यांनी, 'हृदयरोग हे जगभरातील मृत्यूचे एक प्रमुख कारण ठरत आहे याकडे लक्ष वेधले. हृदयविकाराचा झटका, स्ट्रोक, धमनीशी निगडित रोग आणि इतर प्रकारचे हृदयरोग कमी वयातही उद्भवू लागले आहेत', असे सांगितले. साखर नियंत्रणात ठेवा रक्तातील साखरेच्या वाढत्या प्रमाणामुळे एथेरोस्क्लेरोसिस होतो. त्यामुळे धमन्यांचे कार्य विस्कळीत होते. गर्भारपणातील मधुमेह, लठ्ठपणा किंवा अकाली प्रसूतीमुळे महिलांमध्ये हृदयविकाराचा धोका निर्माण होतो, असेही वैद्यकीय तज्ज्ञांनी स्पष्ट केले आहे. छाती जड वाटणे, श्वास घेण्यास त्रास आणि वेदना, अचानक धडधडणे, हृदयाला सूज येणे, पंपिंग क्षमता कमी होणे, यासारख्या समस्या कोव्हीड नंतरच्या स्थितीत रुग्णांमध्ये दिसत आहेत. डॉक्टरांचा सल्ला - ताजी फळे, भाज्या आणि मोड आलेल्या कडधान्यांचा समावेश असलेला परिपूर्ण, संतुलित आहार घ्या. - पोषक आहारामुळे रक्तदाब आणि कोलेस्ट्रॉरॉल कमी होतो. - तंतुमय पदार्थ, कमी चरबीयुक्त, दुग्धजन्य पदार्थांचे सेवन करा. - मीठ तसेच साखरेचे आहारातील प्रमाण मर्यादित ठेवा. - धावणे, पोहणे तसेच सायकलिंगसारखा पर्याय निवडा. रोज किमान अर्धा तास व्यायाम करा. - धूम्रपान, मद्यपान आणि अमली पदार्थांचे सेवन टाळा.
