: मुंबईत एका बाजूला सेलिब्रिटींची धरपकड करीत असताना दुसरीकडे मुंबई पोलिसांनी ड्रग्जची साखळी उद्ध्वस्त करण्यावर लक्ष केंद्रित केले आहे. त्यातूनच बुधवारी मानखुर्द येथून २१ कोटी रु.चे हेरॉइन हस्तगत करण्यात आले. मानखुर्द, गोवंडी, देवनार हा मुंबईच्या वेशीवर असलेला भाग सध्या अमली पदार्थांचे केंद्र बनत आहे. दाटीवाटीची वस्ती, झोपड्यांचा परिसर आणि गुन्हेगारी पार्श्वभूमीच्या लोकांचे वास्तव्य अधिक यामुळे अमली पदार्थ लपविण्यासाठी याच भागाचा वापर होत आहे. अमली पदार्थ विरोधी पथकाने ऊर्फ लाली या महिला पुरवठादाराला सायन कोळीवाडा येथून अटक केली. तिच्याकडून मानखुर्दच्या लल्लुभाई कम्पाऊंडमध्ये ठेवण्यात आलेला हेरॉइनचा साठा हस्तगत करण्यात आला. पोलिसांनी याआधी देखील मानखुर्द तसेच आजुबाजूच्या गोवंडी, देवनार, शिवाजीनगर भागात कारवाई करून तस्करांवर कारवाई केली आहे. राज्याबाहेरून येणारा साठा रस्तेमार्गे आल्यास वाशी येथून याच परिसरात उतरविला जातो. नाकाबंदी, खबरे, पोलिसांची गस्त यामुळे दक्षिण मुंबईपर्यंत मोठ्या प्रमाणातील साठा नेणे शक्य नसल्याने याच परिसराचा आसरा घेतला जातो. गुन्हेगारी प्रवृत्तीच्या अनेकांचा या भागात वावर असल्याने या तस्करीसाठी सहज माणसे मिळतात. दाटीवाटीची वस्ती, झोपडपट्टीचा परिसर, विस्थापितांसाठी बांधलेल्या संकुलातील घुसखोरी यामुळे या भागात हा माल सहज लपला जातो. यापूर्वीही तस्करीत अटक मानखुर्द, गोवंडीतून मुंबईत अन्यत्र, ठाणे किंवा पश्चिम उपनगर येथे रस्तेमार्गे जाणे तस्करांना सोयीचे ठरते. या सर्व बाबींचा विचार करता पोलिसांनी आता या भागावर अधिक लक्ष केंद्रित केले आहे. हेरॉइनसह अटक केलेल्या लाली हिला याआधीही अमली पदार्थ विरोधी पथकाच्या वरळी युनिटने पकडले होते. त्यावेळीही तिच्याकडे हेरॉइन सापडले होते. अशा रेकॉर्डवरील गुन्हेगारांना पोलिस कारवाईचा अंदाज असल्यानेच ड्रग्जसाठा लपविण्यासाठी अशा जागांचा वापर केला जात असल्याचे एका अधिकाऱ्याने सांगितले.
