म. टा. खास प्रतिनिधी, मुंबई:'' या कॉमेडी शोमध्ये हिंदू देवदेवतांबद्दल अपशब्द वापरण्यात आल्याने समाजात तेढ निर्माण होऊन कायदा सुव्यवस्था बिघडण्याची शक्यता आहे. त्यामुळे या वांद्रे येथील रंगशारदा सभागृहात या कार्यक्रमाचा प्रयोग केल्यास आणि त्यामुळे काही अनुचित प्रकार घडल्यास तुम्हाला दोषी ठरविण्यात येईल, अशी तंबी वांद्रे पोलिसांनी या आयोजकांना दिली आहे. वांद्रे येथील रंगशारदा सभागृहात रंगमंच प्रॉडक्शनच्या माध्यमातून ३० आणि ३१ ऑक्टोबर रोजी 'डोंगरी टू नोव्हेअर' हा कॉमेडी कार्यक्रम सादर करण्यात येणार आहे. या कार्यक्रमामध्ये हिंदू देवतांबद्दल अपशब्द, त्यांचा अवमान केला जात असल्याचे म्हटले जाते. या कार्यक्रमामुळे यापूर्वी काही ठिकाणी अनुचित घटना घडल्याची उदाहरणे आहेत. हा कार्यक्रम आयोजित करण्यापूर्वी पोलिस परवानगी घेण्यात आलेली नाही. तिकीटविक्री सुरू केल्यानंतर आयोजकांनी याबाबत केवळ एका पत्राद्वारे पोलिसांना कळविले. काही हिंदुत्ववादी संघटनांनी या कार्यक्रमाला विरोध केला होता. हा कार्यक्रम सादर झाल्यास हिंदू तसेच, इतर धर्मियांच्या भावना दुखावल्या जाण्याची शक्यता आहे. त्यामुळे याची गंभीर दाखल मुंबई पोलिसांनी घेतली आहे. वांद्रे पोलिसांनी कलम १४९ अंतर्गत या कार्यक्रमाच्या आयोजकांना एक नोटीस बजावली आहे. यामध्ये कार्यक्रमाच्या सादरीकरणावेळी हिंदू अगर इतर धर्मियांच्या भावना दुखावतील असे वक्तव्य केल्यास आणि यामुळे भावना दुखावल्यास त्यासाठी आपणास सर्वस्वी जबाबदार ठरवले जाईल, असे या नोटीसमध्ये म्हटले आहे.
