म. टा. विशेष प्रतिनिधी, मुंबईः मुंबईत पालिकेने नेमलेल्या काही क्लीन अप मार्शलविषयी अनेक तक्रारी येत आहेत. अशाचप्रकारे घाटकोपरमध्ये बोगस क्लीन अप मार्शल वावरत असल्याची तक्रार पोलिस ठाण्यात नोंदविण्यात आली आहे. त्यानंतरही मंगळवारी हे कथित मार्शल पुन्हा आढल्याचे सांगितले जाते. मुंबईत काही क्लीन अप मार्शलविरोधात गणवेश परिधान न करता कारवाई, गैरवर्तणूक अशाप्रकारच्या अनेक तक्रारी आल्या आहेत. यातच ३० सप्टेंबरला दोघांनी क्लीन अप मार्शल असल्याचा बनाव रचत मास्क न वापरणाऱ्या व्यक्तींविरोधात कारवाई केल्याच्या तक्रारी होत्या. त्याविषयी पालिकेचे माजी विरोधी पक्षनेते प्रवीण छेडा यांनी विभाग कार्यालयाशी संपर्क साधला. त्यानंतर कार्यालयाच्या सूचनेनुसार त्यांनी घाटकोपरमधील पंतनगर येथे पोलिस ठाण्यात तक्रार नोंदविली. या प्रकरणाचा तपास सुरू असतानाच ज्यांच्याविरोधात तक्रार नोंदवण्यात आली होती, ते दोन्ही बोगस मार्शल मंगळवारी घाटकोपरमध्ये एका वाहनातून गस्त घालत असल्याचे सांगण्यात येते. त्यासाठी या दोघांनी तक्रारीत नमूद केलेले वाहन वापरल्याचा दावाही छेडा यांनी केला.
