नवी दिल्लीः बिहारचे माजी मुख्यमंत्री आणि हिंदुस्तानी आवाम मोर्चा (HAM सेक्युलर) पक्षाचे प्रमुख ( ) यांनी बुधवारी मोठा आरोप केला आहे. एका केंद्रीय मंत्र्यासह ५ खासदार बनावट जात प्रमाणपत्रांच्या आधारे अनुसूचित जातीसाठी (SC) राखीव असलेल्या जागांवर निवडले गेले. यामुळे त्यांची चौकशी करण्याची मागणी मांझी यांनी केली आहे. माजी मुख्यमंत्री मांझी यांनी उघड केली नावं मांझी यांनी पक्षाच्या बैठकीत गंभीर आरोप केले. केंद्रीय मंत्री एस. पी. सिंह बघेल आणि जे. शिवाचार्य महास्वामीजी (दोन्ही भाजप खासदार) यांचा यात समावेश आहे. याशिवाय काँग्रेसचे खासदार मोहम्मद सादिक, तृणमूल काँग्रेसच्या अपरुपा पोद्दार आणि अपक्ष खासदार नवनीत रवी राणा यांचीही नावे त्यांनी घेतली. बनावट प्रमाणपत्रांच्या आधारे निवडणूक लढवल्यानंतर हे अनुसूचित जातीसाठी राखीव जागांचे प्रतिनिधित्व करत आहेत, असा आरोप मांझी यांनी केला आहे. मांझींनी एका केंद्रीय मंत्र्यासह भाजपच्या दोन खासदारांची नावं सांगितली मांझींच्या आरोपांवर या खासदारांकडून कोणतीही प्रतिक्रिया आलेली नाही. पण त्यातील बहुतेकांनी हे आरोप आधीच फेटाळले आहेत. बघेल यांची जात उत्तर प्रदेशात एससी म्हणून अधिसूचित आहे, जिथून ते निवडून आले होते, असं त्यांच्या सहकाऱ्यांनी सांगितलं. तर नवनीत राणा यांचे जात प्रमाणपत्र मुंबई हायकोर्टाने रद्द केले होते. पण सुप्रीम कोर्टाकडून नवनीत राणा यांना दिलासा मिळाला आहे. जूनमध्ये हायकोर्टाच्या निर्णयाला सुप्रीम कोर्टाने स्थगिती दिली होती.
