नवी दिल्ली : प्रसिद्ध इतिहासकार आणि विजेते बाबासाहेब पुरंदरे यांचं सोमवारी पुण्यातील दीनानाथ मंगेशकर रुग्णालयात निधन झालंय. मृत्यूसमयी ते ९९ वर्षांचे होते. बाबासाहेब पुरंदरेंच्या मृत्यूवर पंतप्रधान नरेंद्र मोदींसहीत देशातील वेगवेगळ्या क्षेत्रातील दिग्गजांनी दु:ख व्यक्त केलंय. बाबासाहेब पुरंदरे यांच्यासोबतचा आपला एक फोटो सोशल मीडियावर ट्विट करत पंतप्रधान मोदींनी शिवशाहिरांना आदरांजली वाहिलीय. 'हे शब्दांच्या पलिकडचं दु:ख आहे. शिवशाहीर यांचं निधनानं इतिहास आणि संस्कृतीच्या जगात एक मोठी पोकळी निर्माण झालीय. त्यांच्यामुळेच येणाऱ्या पीढ्या छत्रपती शिवाजी महाराजांशी जोडल्या जातील. त्यांचे इतर कार्यही कायम स्मरणीय राहील', असं ट्विट पंतप्रधान मोदींनी केलंय. वयोमानानुसार त्यांच्या प्रकृतीच्या अनेक तक्रारी जाणवत होत्या. गेल्या काही दिवसांपासून त्यांच्यावर रुग्णालयात उपचार सुरू होते. तब्येत बिघडल्यानंतर त्यांना व्हेन्टिलेटरवर ठेवण्यात आलं होतं. मात्र, रविवारी त्यांची प्रकृती आणखीनच खालावली त्यामुळे त्यांची प्रकृती चिंताजनक असल्याची माहिती डॉक्टरांनी दिली होती. त्यानंतर सोमवारी सकाळी बाबाहेबांच्या मृत्यूची बातमी जाहीर करण्यात आली. बाबासाहेब पुरंदरे नावानं ओळखल्या जाणाऱ्या शिवशाहिरांचं खरं नाव बलवंत मोरेश्वर पुरंदरे असं होतं. २९ जुलै १९२२ रोजी बाबासाहेब पुरंदरे यांचा जन्म झाला होता. २०१९ साली त्यांना 'पद्म विभूषण' पुरस्कार देऊन गौरविण्यात आलं होतं.
