मुंबई : करोनाचा आतापर्यंतचा घातक विषाणू असलेल्या ओमिक्राॅनच्या वृत्तानंतर कमॉडिटी बाजारात सोने वधारले होते. मागील सहा सत्रात सोने आणि चांदीमध्ये सुरु असलेल्या तेजीला आज ब्रेक लागला आहे. आज गुरुवारी एमसीएक्सवर सोने १२० रुपयांनी तर चांदी १०० रुपयांनी स्वस्त झाली. मल्टी कमॉडिटी एक्सचेंजमध्ये सध्या सोन्याचा ४७७५२ रुपये असून त्यात १२० रुपये घसरण झाली आहे. तत्पूर्वी आज सोन्याचा भाव ४७७०० रुपयांपर्यंत खाली घसरला होता. एक किलो ६१२३७ रुपये असून त्यात ७० रुपये घसरण झाली आहे. तत्पूर्वी चांदीचा भाव ६११५६ रुपये इतका खाली घसरला होता. बड्या देशांनी ओमिक्राॅनचा फैलाव रोखण्यासाठी लाॅकडाऊनची तयारी सुरु केली आहे. यामुळे पुन्हा अर्थव्यवस्था संकटात जाईल या भीतीने गुंतवणूकदारांनी सोने आणि चांदीकडे धाव घेतली होती. मात्र भांडवली बाजारात पुन्हा तेजी परतल्याने गुंतवणूकदार तिथे वळाले आहेत. Goodreturns या वेबसाईटनुसार आज गुरुवारी मुंबईत २२ कॅरेट सोन्याचा भाव ४७१२० आणि २४ कॅरेटचा भाव ४८१२० रुपयांवर कायम आहे. आज दिल्लीत सराफा बाजारात २२ कॅरेट सोन्याचा भाव ४६७४० रुपये इतका खाली आला आहे. दिल्लीत २४ कॅरेटचा सोन्याचा भाव ५०९९० रुपये आहे. आज चेन्नईत २२ कॅरेटसाठी ४४८७० रुपये तर २४ कॅरेट सोन्याचा भाव ४८९५० रुपये इतका आहे. कोलकात्यात आज २२ कॅरेट सोन्याचा भाव ४६९४० रुपये असून २४ कॅरेट सोन्याचा भाव ४९६४० रुपये इतका आहे. आज जागतिक कमॉडिटी बाजारात स्पॉट गोल्डचा भाव ०.१ टक्क्यांनी वाढला आणि तो १७८०.३६ डॉलर प्रती औंस झाला. यूएस गोल्ड फ्युचर्सचा भाव १७८२.५० डॉलर प्रती औंस झाला. चांदीचा भाव ०.३ टक्क्यांनी वधारला असून तो २२.३७ डॉलर प्रती औंस झाला आहे. अमेरिकेची मध्यवर्ती बँक असलेल्या फेडरल रिझर्व्हचे अध्यक्ष जेरॉम पॉवेल यांनी बँक लवकरच बॉण्ड खरेदी बंद करण्याबाबत निर्णय घेईल, असे म्हटलं आहे.
