मुंबई : एखादी भन्नाट कॅच तुम्हाला सामना कसा जिंकवून देऊ शकते, याचा प्रत्यय पुन्हा एकदा आयपीएलमध्ये पाहायला मिळाला. हवेत उडी मारत फक्त एका हातात हा आयपीएलमधला भन्नाट झेल घेतल्याचे पाहायला मिळाले. त्यानंतर या कॅचचा व्हिडीओ जगभरात व्हायरल झाल्याचे पाहायला मिळाले. नेमकं घडलं तरी काय, पाहा... ही गोष्ट घडली ती आयपीएलमधल्या शनिवारच्या सामन्यात.हा सामना आरसीबी आणि दिल्ली कॅपिटल्स यांच्यामध्ये सुरु होता. या सामन्यात आरसीबीने दिल्लीपुढे १९० धावांचे लक्ष्य ठेवले होते आणि दिल्लीचा कर्णधार रिषभ पंत हा धडाकेबाज फटकेबाजी करत होता. त्यावेळी १७व्या षटकाच्या तिसऱ्या चेंडूवर ही गोष्ट घडली. हे षटक आरसीबीचा वेगवान गोलंदाज मोहम्मद सिराज टाकत होता. या तिसऱ्या चेंडूवर पंत मोठा फटका मारायला गेला. हा फटका मारताना पंतला तोल ढासळला आणि चुकीचा फटका बसला. त्यामुळे हा चेंडू आता कुठे जाणार, याची उत्सुकता सर्वांना लागली होती. पण त्यावेळी विराट कोहली मात्र मैदानात सतर्क होता. कोहलीच्या दिशेने हा चेंडू जाताना दिसत असता तरी तो त्याच्या डोक्यावरून जाणार, असे दिसत होते. पण हार मानेल तो कोहली कसला. कोहलीने यावेळी हवेत उडी मारत एका हातात हा भन्नाट कॅच पकडल्याचे पाहायला मिळाला. काही क्षण तर बऱ्याच जणांना हा झेल पकडला आहे, यावर विश्वासच बसला नाही. पण रिप्लेमध्ये जेव्हा पुन्हा एकदा पाहिले तेव्हा बऱ्याच जणांना कोहलीने हा झेल पकडल्याचे समजले. पण हा एकच झेल सामन्याची दिशा बदलणार ठरला. कारण पंत हा जोरदार फटकेबाजी करत होता. त्यामुळे पंत आता दिल्लीला सामना जिंकवून देणार, असे वाटत होते. त्यामुळे पंतची विकेट ही आरसीबीसाठी सर्वात महत्वाची होती. कोहलीने अप्रतिम झेल पकडला आणि पंतला त्याने माघारी धाडले. पंतने यावेळी १७ चेंडूंत ३४ धावांची दमदार खेळी साकारली. त्यामुळे पंत जर यावेळी आऊट झाला नसता तर दिल्लीला हा सामना जिंकण्याची सुवर्णसंधी होती. पण पंत बाद झाला आणि दिल्ली आता विजय मिळवू शकत नाही, हे जवळपास पक्के झाले. कोहलीच्या या भन्नाट एका कॅचमुळे सामना आरसीबीच्या बाजूने फिरल्याचे पाहायला मिळाले.
