वृत्तसंस्था, जम्मू-काश्मीरच्या अनंतनाग जिल्ह्यातील अमरनाथ यात्रेच्या मार्गाजवळ सुरक्षा दलाबरोबर झालेल्या चकमकीत 'हिज्बुल मुजाहिदीन'चे तीन दहशतवादी ठार झाले. या दहशतवाद्यांमध्ये एका स्वयंघोषित कमांडरचा समावेश आहे. पहलगाम येथील श्रीचंद वनक्षेत्रात दहशतवादी असल्याबाबतची माहिती सुरक्षा दलांना मिळाली. यानुसार जवानांनी या परिसरास वेढा घातला व शोधमोहीम हाती घेतली. या वेळी लपलेल्या दहशतवाद्यांनी गोळीबार सुरू केल्यावर सुरक्षा दलांनी त्यास प्रत्युत्तर दिले. यामध्ये तीन दहशतवादी मारले गेले, असे पोलिस अधिकाऱ्यांनी सांगितले. हे तिघेही 'हिज्बुल मुजाहिदीन'चे दहशतवादी आहेत. यातील एकाचे नाव अश्रफ मौलवी असे असून, तो खूप वर्षांपासून दहशतवादी कारवाया करीत होता, अशी माहिती काश्मीरचे पोलिस महासंचालक विजयकुमार यांनी दिली. अमरनाथ यात्रा मार्गावरील ही मोहीम सुरक्षा दलांचे मोठे यश आहे, असेही ते म्हणाले.
