मंगळयानाबद्दल मोठी अपडेट, ८ वर्ष कार्यरत, ४५० कोटींचा खर्च,ऐतिहासिक कामगिरी करणाऱ्या यानाचा संपर्क तुटला - Times of Maharashtra

ठळक बातम्या

Monday, October 3, 2022

मंगळयानाबद्दल मोठी अपडेट, ८ वर्ष कार्यरत, ४५० कोटींचा खर्च,ऐतिहासिक कामगिरी करणाऱ्या यानाचा संपर्क तुटला

https://ift.tt/1DI3Akv
नवी दिल्ली : भारताचं मिशन मंगळयान अखेर संपलं आहे. गेल्या आठ वर्षापासून अंतराळात असलेल्या मंगळयानातील इंधन आणि बॅटरी संपल्यानं ही मोहीम संपली आहे. मंगळयान म्हणजेच मार्स ऑर्बिटर मिशनचा आठ वर्ष आठ दिवसांचा प्रवास संपला आहे. भारतानं हे यानं ५ नोव्हेंबर २०१३ ला लाँच केलं होतं. ते २४ सप्टेंबर २०१४ ला मंगळाच्या कक्षेत पोहोचलं होतं. त्या मिशनद्वारे भारत जगातील पहिला देश बनला होता जो थेट मंगळ ग्रहापर्यंत पोहोचला होता. मंगळयान मिशनसाठी ४५० कोटी रुपयांचा खर्च आला होता. इस्त्रोनं पीटीआयला दिलेल्या माहितीनुसार मंगळयानातील इंधन संपलं होतं. स्पेसक्राफ्टची बॅटरी देखील संपली होती. आमचा मंगळयानासोबतचा संपर्क देखील तुटला होता. मात्र, इस्त्रोनं याबाबत त्यांच्या अधिकृत ट्विटर अकाऊंटवरुन माहिती प्रसिद्ध केली नाही. इस्त्रोच्या अधिकाऱ्यानं नाव न सांगण्याच्या अटीवर दिलेल्या माहितीनुसार मंगळ ग्रहावर सातत्यानं ग्रहणं निर्माण होतं होती. सर्वात मोठं ग्रहण साडे सात तासांचं होतं. मंगळयानाची बॅटरी सूर्यप्रकाश नसेल तर एक तास ४० मिनिटं सुरु राहू शकत होती. त्यानंतर ती कार्यरत राहत नव्हती. भारतीय अवकाश संशोधन संस्था इस्त्रोनं मंगळयान मोहीम केवळ ६ महिन्यांच्या कालावधीच्या अंदाजानं सुरु केली होती. मंगळयानानं पाठवलेल्या माहितीच्या आणि चित्रांच्या आधारे जगाचा मंगळ ग्रहाकडे पाहण्याचा दृष्टीकोन बदलला. भारतानं मंगळयान तंत्रज्ञान दाखवून देण्यासाठी पाठवलं होतं. मात्र, भारताच्या मंगळयानानं जे काम आतापर्यंत केलं ते इतर देशांचं अंतराळयान करु शकलेलं नाही. मंगळायानात पाच पेलोडस होते, त्याचं वजन १५ किलो होतं. मंगळग्रहाची भौगौलिक, वायुमंडळातील प्रक्रिया, भूपृष्टावरील तापमान याची माहिती गोळा करणं हे काम मंगळयानाचं होतं. मार्स कलर कॅमेरा, थर्मल इन्फ्रारेड इमेजिंग स्पेक्ट्रोमीटर, मिथेन सेंसर फॉर मार्स, मार्स एक्सोस्फेयरिक न्यूट्रल कंपोजिशन अनालायझर आणि लिमेन अल्फा फोटोमीटर याच्याद्वारे मंगळयानाचं काम सुरु होतं. मंगळयान कमी वेळात बनवण्यात आलं होतं. वजन आणि मिशनच्या तुलनेत ते कमी किमतीमध्ये तयार झालं होतं. मार्स कलर्स कॅमेऱ्यातून १००० फोटो टिपण्यात आले. मंगळयान मोहिमेचा दुसरा टप्पा पुन्हा सुरु केला जाण्याची शक्यता आहे.