मुंबई: आम्ही शिवाचे सैनिक वेडे, करू जिवाचे रान... जात गोत्र आणि धर्म आमचा शिवसेना शिवसेना शिवसेना... या शिवसैनिकांमध्ये व शिवसेना समर्थकांमध्ये प्रिय झालेल्या शिवसेनेच्या गाण्याला टक्कर देण्यासाठी शिंदे गटाकडून दसरा मेळाव्यादरम्यान नवे गीत सादर करण्यात येणार आहे. दसरा मेळाव्यासाठी शिंदे गटाकडून सध्या जय्यत तयारी सुरू आहे. या मेळाव्यासाठी शिंदे गटाने नव्या झेंड्याची घोषणा केली आहे. शिंदे गटाच्या या नव्या झेंड्यात बाळासाहेब ठाकरे आणि आनंद दिघे यांचे छायाचित्र असणार आहे. यानंतर शिंदे गटाने आता शिवसेनेच्या लोकप्रिय गाण्याला टक्कर देण्यासाठी नव्या शिवसेना गीतावर काम सुरू केले आहे. यासाठी सध्या एक चमू कार्यरत असून या शिवसेना गीताचे काम अंतिम टप्प्यात असल्याची माहिती सूत्रांकडून देण्यात आली. दसरा मेळाव्याच्या निमित्ताने सध्या शिवसेना आणि शिंदे गटामध्ये जोरदार सामना रंगताना दिसत आहे. आता त्यात या नव्या गाण्याची भर पडणार आहे. शिवसेनेच्या गीत मराठीतील आघाडीचे संगीतकार अवधूत गुप्ते आणि स्वप्नील बांदोडकर यांचा सहभाग होता. शिंदे गटाच्या या गीताचे गायक-संगीतकार कोण आहेत, हे अद्याप गुलदस्त्यात आहे. शिंदे गटाकडून सध्या बाळासाहेब ठाकरे आणि धर्मवीर आनंद दिघे यांचा विचारांचा वारसा पुढे नेण्याचा प्रयत्न होत आहे. त्यामुळे या गीतातही त्यावर भर देण्यात आल्याचे सूत्रांनी सांगितले.
