मुंबई : महाराष्ट्र नवनिर्माण सेनेनं दरवर्षीप्रमाणं यंदा देखील दिवाळीच्या निमित्त कार्यक्रमाचं आयोजन केलं आहे. मनसेच्या वतीनं आयोजित करण्यात आलेल्या शिवाजी पार्क दीपोत्सव कार्यक्रमाचा शुभारंभ २१ ऑक्टोबरला होणार आहे. मनसेकडून मुंबईतील शिवाजी पार्कवर दरवर्षी दीपोत्सवाचं आयोजन केलं जातं. या कार्यक्रमाला मनसे प्रमुख राज ठाकरे उपस्थित असतात. यंदा राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस देखील उपस्थितत राहणार आहेत. एकनाथ शिंदे देवेंद्र फडणवीस यांची उपस्थिती मनसे अध्यक्ष राज ठाकरे यांच्या संकल्पनेतून साकारलेल्या या शिवाजी पार्क दीपोत्सव या नेत्रदीपक कार्यक्रमाच्या उद्घाटनाला राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस उपस्थित राहणार आहेत. राज ठाकरेंच्या मनसेच्या कार्यक्रमाला एकनाथ शिंदे आणि देवेंद्र फडणवीस उपस्थित राहणार असल्यानं राजकीय वर्तुळाचं लक्ष या कार्यक्रमाकडे लागलं आहे. मनसेच्या पदाधिकाऱ्यांनी शिवाजी पार्क दीपोत्सव कार्यक्रमाला मुंबईतील सर्व विभाग अध्यक्ष तसेच शाखा अध्यक्ष,महिला – पुरुष पदाधिकारी यांनी या दीपोत्सव कार्यक्रमास उपस्थित राहावे, असं आवाहन करण्यात आलं आहे. राज ठाकरे, देवेंद्र फडणवीस आणि एकनाथ शिंदे एकाच मंचावर महाराष्ट्रातील उद्धव ठाकरे यांच्या नेतृत्त्वातील महाविकास आघाडीचं सरकार कोसळल्यानंतर भाजपच्या पाठिंब्यावर एकनाथ शिंदे मुख्यमंत्री झाले तर देवेंद्र फडणवीस उपमुख्यमंत्री झाले. एकनाथ शिंदे यांच्या सरकारच्या विश्वासदर्शक ठरावाला मनसेचे एकमेव आमदार राजू पाटील यांनी पाठिंबा दिला होता. राज ठाकरे आणि एकनाथ शिंदे यांच्या गेल्या काही चार महिन्यात तीन वेळा भेटी झाल्या आहेत. राज ठाकरेंच्या निवासस्थानी एकनाथ शिंदे यांनी भेट दिली होती. राज ठाकरे देखील मुख्यमंत्र्यांना भेटण्यासाठी वर्षावरर दाखल झाले होते. तर, देवेंद्र फडणवीस आणि राज ठाकरे यांच्यातील संबंध देखील गेल्या काही दिवसांमध्ये चांगले राहिले आहेत. देवेंद्र फडणवीस यांनी देखील राज ठाकरेंच्या निवासस्थानी भेट दिली होती. मुंबई क्रिकेट असोसिएशनच्या निवडणुकीच्या निमित्तानं आज शरद पवार, देवेंद्र फडणवीस, एकनाथ शिंदे एकाच मंचावर आले होते. आता राज ठाकरे, देवेंद्र फडणवीस आणि एकनाथ शिंदे एकत्र येणार असल्यानं राजकीय टोलेबाजी होण्याची शक्यता आहे.
