नवी मुंबई : पनवेल मुंबई-गोवा महामार्गावर तारा गावाच्या हद्दीत शुक्रवारी ऑडी एमएच.१४ जीए.९५८५ या क्रमांकाच्या गाडीत पुरुषाचा मृतदेह आढळल्याने एकच खळबळ उडाली आहे. महामार्गावर केंद्रिय मंत्री नारायण राणे यांचे फार्महाऊस आहे. या फार्महाऊस लगत हा मृतदेह मागील दोन दिवसांपासून गाडीत होता. घटनेची माहिती मिळताच तालुका पोलीस ठाण्याच्या पथकाने घटनास्थळी धाव घेतली. संबंधित गाडी पुणे जिल्ह्यातील होती. गाडी लॉक असल्याने गाडीतील मृतदेह बाहेर काढण्यास पोलिसांना अडचणी निर्माण झाल्या. मात्र, एक्सपर्टच्या मदतीने गाडी उघडण्याचा प्रयत्न करत होते. गाडीतील संशयास्पद मृतदेहाची माहिती मिळताच पोलिसांनी घटनास्थळी धाव घेतल्यानंतर बघ्यांची देखील मोठी गर्दी याठिकाणी जमली होती. संबंधित घटना अपघात आहे की घातपात आहे? याबाबत पोलीस तपास करत आहेत. मुंबई-गोवा रोडवर ऑडी कारमध्ये बॉडी सापडली होती त्याचे नाव संजय कारला असे असून त्याच्या छातीत चार गोळ्या मारल्याचे समोर आलं आहे. तसेच तो पुण्यातील असल्याचे सुद्धा समजले आहे. पुढील तपास तालुका पोलीस स्टेशनचे पोलीस करत आहेत.
