दोहा: यंदाच्या फिफा वर्ल्ड कप फुटबॉल स्पर्धेचा ‘क’ गट म्हणजे अर्जेंटिनाचा बोलबाला. अर्जेंटिनाचा अपवाद वगळता या गटात जागतिक क्रमवारीमधील अव्वल दहांतील एकही संघ नाही. अर्जेंटिनासह मेक्सिको, पोलंड आणि सौदी अरेबिया यांचा या गटात समावेश आहे. अर्जेंटिना
- अर्जेंटिनाने वर्ल्ड कप जिंकून ३६ वर्षांचा कालावधी लोटला आहे. मारिओ केम्प्स (१९७८) आणि दिएगो मॅराडोना (१९८६) यांच्यानंतर अर्जेंटिनास जगज्जेते करण्याची ३५ वर्षीय लिओनेल मेस्सीसाठी मात्र ही अखेरची संधी असेल.
- गेल्या वर्षी पार पडलेल्या कोपा अमेरिका स्पर्धेच्या अंतिम फेरीत ब्राझिलला नमवून जेतेपद पटकावल्यामुळे अर्जेंटिनाचा आत्मविश्वास दुणावलेला.
- अर्जेंटिनाचा मिडफील्डर गिओेव्हानी लो सेल्सोला गेल्याच वीकेन्डला पार पडलेल्या ला लिगा स्पर्धेच्या लढतीत दुखापत झाली असून, तो वर्ल्ड कपला मुकणार आहे.
- यंदाही वर्ल्ड कपमध्ये मेस्सी आकर्षणाचे केंद्रस्थान असेल. त्याचे ३५ वर्षे हे वय बघता हा त्याचा अखेरचा वर्ल्ड कप असेल अन् याद्वारे अर्जेंटिनाचा वर्ल्ड कप जेतेपदाचा दुष्काळ संपविण्याचा त्याचा प्रयत्न असेल.
- फिफा जागतिक युवा अजिंक्यपद (२००५), ऑलिम्पिक सुवर्णपदक (२००८), कोपा अमेरिका (२०२१) अशा महत्त्वाच्या स्पर्धांची जेतीपदे मेस्सीच्या नावावर जमा आहेत; पण वर्ल्ड कप ट्रॉफीची पोकळी तज्ज्ञांसह फुटबॉलप्रेमींच्या नजरेतून सुटत नाही.
- अर्जेंटिना फुटबॉल संघ म्हणजे; आक्रमकांच्या फळीत गुणांची खाण. याच फळीतील सध्याचे नाव म्हणजे ज्युलियन अल्वारेझ. व्यावसायिक फुटबॉलमध्ये मँचेस्टर सिटीचे प्रतिनिधित्व करणाऱ्या या फुटबॉलपटूने मोक्याच्या क्षणी गोल करत उपयुक्तता सिद्ध केली आहे.
- अमेरिकेत १९९४मध्ये पार पडलेल्या वर्ल्ड कपपासून मेक्सिकोने सातत्याने पुढील फेरीत प्रवेश केला आहे. आकडेवारीचा हिशेब बघता अशी कामगिरी फ्रान्स, जर्मनी आणि अर्जेंटिनालाही जमली नाही. तरीदेखील जागतिक दर्जाचे ‘स्टार’ फुटबॉलपटू नसल्याने हा संघ वर्ल्ड कपमध्ये बाद फेरीपर्यंत जाताना दिसत नाही अन् या फेरीत गेला तरी सामना न जिंकताच माघारी येतो.
- जेव्हियर हर्नांडेझ, कार्लोस व्हेला आणि गिओवानी दोस सान्तोस या महत्त्वाच्या खेळाडूंनी अलीकडेच राष्ट्रीय संघातून माघार घेतली असून, तरुण फळीला ठसा उमटविता आलेला नाही.
- वॉलव्हरहॅम्प्टन वाँडरर्सचा फॉरवर्ड रॉल जिमेनेझ मेक्सिकोसाठी ‘प्लेमेकर’ ठरू शकतो; पण या ३१ वर्षांच्या खेळाडूला यंदा सप्टेंबरमध्ये दुखापत झाली होती. यंदाच्या मोसमात त्याने तीन लढतींमध्ये भाग घेतला. जिमेनेझ कतारला खेळेल की नाही, याबाबत अजूनही संभ्रम आहे. त्याची उणीव मेक्सिकोला जाणवेल अन् याचा परिणाम कामगिरीवर होईल.
- चपळ असलेल्या एडसन अल्वारेझच्या कामगिरीकडेही सर्वांचे लक्ष असणार आहे.
- पोलंडला १९९०पासून फक्त तीन वेळा वर्ल्ड कपसाठी पात्र ठरता आले आहे. अन् या तिन्ही संधींचा फायदा उठवणे त्यांना जमलेले नाही. पोलंडचे आव्हान गटातच आटोपले. मात्र, त्याआधी १९७४ आणि १९८२मध्ये पोलंडने वर्ल्ड कपमध्ये तिसरा क्रमांक पटकावला आहे.
- रॉबर्ट लेवान्डोवस्की, वोजिच आणि मिलिक यांचा उदय झाल्याने २०१८च्या वर्ल्ड कपच्या वेळी पोलंडकडून चांगल्या कामगिरीची अपेक्षा केली जात होती. मात्र, हा संघ गट लढतींच्या पुढे गेला नाही. दोन पराभव झाले अन् जपानविरुद्ध विजय, अशी त्यांची कामगिरी होती.
- जागतिक क्रमवारीत २६व्या क्रमांकावरील पोलंडची सलामी २२ नोव्हेंबरला मेक्सिकोविरुद्ध असेल अन् हाच सामना त्यांची पुढील वाटचाल निश्चित करेल.
- यंदाचा फुटबॉल मोसम लेवान्डोवस्कीसाठी निर्णायक ठरला, असे म्हटल्यास वावगे ठरणार नाही. आठ वर्षांच्या करारानंतर त्याने बायर्न म्युनिककडून ला लिगामधील महत्त्वाचा संघ बार्सिलोनाच्या गोटात प्रवेश मिळवला. सध्याच्या घडीला या लीगमध्ये सर्वाधिक १३ गोल लेवान्डोवस्कीच्या नावावर आहेत. ३४ वर्षांचा हा खेळाडू फॉर्मात आहे.
- पोलंडमधील युवा गुणवत्तेत मॅटी कॅशचे नाव प्रामुख्याने घेतले जाते. सरावाला सुरुवात केल्यापासूनच त्याचा समावेश आघाडीच्या फळीत करण्यात आला. या २५ वर्षीय खेळाडूंने प्रीमियर लीगमधील अॅस्टन व्हिलाकडून नॉटिंगहॅम फॉरेस्टच्या गोटात प्रवेश केला असून, प्रत्येक लढतीत त्याला संधी दिली जाते. गेल्या मोसमात या संघाच्या पाठिराख्यांनी कॅशला मोसमातील सर्वोत्तम खेळाडू म्हणून निवडून दिले. गेल्या वर्षी वर्ल्ड कप प्राथमिक फेरीत पोलंडने अँडोरावर ४-१ असा विजय मिळवला. त्यानंतर कॅशने सात लढतींमध्ये पोलंडचे प्रतिनिधित्व केले आहे.
- सौदी अरेबियाने आतापर्यंत सहा वेळा वर्ल्ड कप मुख्य फेरीत प्रवेश केला आहे. मात्र, त्यांना लाजिरवाण्या पराभवांना सामोरे जावे लागले आहे. २००२मध्ये जर्मनीने त्यांचा ८-० असा फडशा पाडला होता, तर २००६मध्ये युक्रेनने त्यांच्यावर ४-० असा एकतर्फी विजय नोंदवला. २०१८मध्ये यजमान रशियाने सौदी अरेबियाचा ५-० असा धुव्वा उडवला आहे.
- वर्ल्ड कपमध्ये अनपेक्षित निकाल लागू शकतात. या स्पर्धेच्या आशियाई प्राथमिक फेरीत सौदी अरेबियाने जपान आणि ऑस्ट्रेलियाच्या पुढे स्थान मिळवले हे विशेष. सौदी अरेबियाचे खेळाडूंकडे फिटनेस, सुरेख पदलालित्य अन् कमालीचे ‘पासिंग’ कौशल्य आहे.
- सौदीतील आघाडीच्या फुटबॉल लीगमधील यशस्वी अल हिलाल आणि अल नासर या संघातील खेळाडूंचा राष्ट्रीय संघात भरणा आहे. त्यामुळे खेळाडूंमध्ये समन्वय़ असणार.
- सौदी अरेबियाच्या वर्ल्ड कप प्रवेशात सालेम अल दावसारीचा महत्त्वाचा वाटा आहे. सालेम हा अल हिलाल संघाचा विंगर. १३ सामन्यांत त्याने सात गोल तडकावले आहेत. २०२१मध्ये अल हिलाल संघाने आशियाई चॅम्पियन्स लीग जिंकली, त्या वेळी सालेमने सर्वोत्तम खेळाडूचे बक्षीस पटकावले होते.
- फिरास अल बुराकनच्या कामगिरीकडे सर्वांचे लक्ष असेल. वयाच्या १९व्या वर्षी त्याने राष्ट्रीय संघात पुनरागमन केले. वयोगटाच्या स्पर्धांतही फिरासची चमक दिसते. यंदा जूनमध्ये पार पडलेल्या २३ वर्षांखालील एशियन कप स्पर्धेत सौदी अरेबियाने उझ्बेकिस्तानवर मिळविलेल्या २-० विजयात फिरासची छाप होती. पारंपरिक सेन्टर फॉरवर्डपेक्षा फिरास वेगळा आहे. त्याचे ‘ड्रिबलिंग’ कौशल्य चकित करणार आहे.
