म. टा. खास प्रतिनिधी, मुंबईः मुंबईत स्वतःच्या मालकीचे घर असावे असे प्रत्येकाचे स्वप्न असते. खासगी सोसायट्यांमध्ये घर खरेदी करणे परवडत नसल्याने अनेकांचा ओढा म्हाडा, एसआरए किंवा एमएमआरडीच्या घरांकडे असतो. तुलनेत ही घरे स्वस्त मिळत असल्याने ते मिळविण्यासाठी काहीही करण्याची तयारी असते. सर्वसामान्य नागरिकांच्या याच मानसिकतेचा पुरेपूर गैरफायदा घेऊन गोरेगावमध्ये २४ जणांची सुमारे अडीच कोटी रुपयांची फसवणूक झाल्याचे समोर आले आहे. जोगेश्वरी विक्रोळी लिंक रोड येथे वास्तव्यास असलेल्या एका बँक कर्मचाऱ्याला त्याच्या मित्राने घराबाबत विचारले. स्वतःचे घर घ्यायचे असल्याचे बँक कर्मचाऱ्याने सांगताच त्याच्या मित्राने नवीनसिंग गोरखा नावाच्या व्यक्तीची माहिती दिली. गोरखा यांचे गोरेगाव येथे कार्यालय असून ते एमएमआरडीची घरे स्वस्तामध्ये मिळवून देत असल्याचे मित्राने सांगितल्यावर दोघेही गोरखा यांना भेटण्यासाठी त्यांच्या कार्यालयात गेले. गोरखा आणि त्यांच्या भावाने एमएमआरडीची घरे मिळविण्याची योजना बँक कर्मचाऱ्यापुढे ठेवली. दोनशे साठ चौरस फुटांचे घर अवघ्या सोळा लाखात मिळत असल्याचे गोरखा बंधूंनी त्यांना सांगितले. इतक्या कमी रकमेत घर मिळत असल्याने बँक कर्मचाऱ्याने तयारी दाखवली आणि ही योजना इतरांनाही सांगितली. अनेक गरजू मध्यमवर्गीय बँक कर्मचाऱ्यासोबत आले. त्यांनी सर्वांनी मिळून जवळपास एक कोटी ३५ लाख नवखा बंधूंना दिले. बँक कमर्चाऱ्यांच्या एका मित्राकडून ४४ लाख तर दुसऱ्याकडून ६६ लाख रुपये घेतले. पैसे देऊन अनेकदा दिवस उलटले तरी घर मिळत नसल्याने नवखा यांच्याकडे विचारणा करण्यात आली असता त्यांनी एमएमआरडीच्या नावाचे वाटपपत्र दिले. यावर पैसे दिलेल्या सर्वांचे फोटो लावून हे पत्र पुन्हा घेतले. घर क्रमांक आणि अधिकाऱ्याची स्वाक्षरी करून पुन्हा दिले जाईल असे सांगितले. दोन वर्षे केवळ चालढकलपणा केला जात असल्याने बँक कर्मचारी आणि त्याच्या मित्रांना नवखा बंधूंवर संशय आला. त्यांनी दिलेली वाटपपत्रे घेऊन सर्वांनी एमएमआरडीचे कार्यालय गाठले. या पत्राची शहानिशा केली असता ते बनावट असल्याचे अधिकाऱ्यांनी स्पष्ट केले. यानंतर पैशासाठी विचारणा केली असता नवखा बंधू उडवाउडवीची उत्तरे देत असल्याने या सर्वांनी गोरेगाव पोलिस ठाण्यात तक्रार केली. नवखा आणि त्याच्या इतर साथीदारांविरुद्ध गोरेगाव पोलिसांनी गुन्हा दाखल केला आहे. जास्त सभासद तितकी किंमत कमी! नवखा बंधू यांनी एमएमआरडीच्या घराची योजना स्पष्ट करून सांगताना सभासद संख्येवर भर दिला होता. घर खरेदी करण्यासाठी जितके जास्त सभासद असतील तितकी घरांची किंमत कमी होईल, अशी बतावणी त्यांनी केली होती. त्यामुळे बँक कर्मचारी आणि त्याच्या मित्रांनी परिचयातील व्यक्तींना याबाबत सांगितले. स्वस्तात घर मिळत असल्याने अनेकांनी गुंतवणूक केली आणि सर्वांची फसवणूक झाली.
