कौशांबी : बँकेतील अफरातफरीची अनेक प्रकरण आपल्याला दिसून येत असतात. अनेकदा बँकेच्या पदाधिकाऱ्यांच्या चुकीच्या निर्णयांचा फटका बसत असतो. उत्तर प्रदेशात यापेक्षा एक वेगळं प्रकरण समोर आलं आहे. कौशांबमधील एका बँकेच्या ग्रामीण भागातील शाखेच्या कॅशिअरनं तिजोरीतील रक्कम भलत्याच कारणासाठी उधळली. कॅशिअरनं बँकेच्या तिजोरीतील पैसा वापरुन सट्टा खेळल्याचं समोर आलं. पोलिसांनी याप्रकरणी आरोपी कॅशिअरला अटक केली आहे. कौशांबीमधील सराय अकिलच्या फरिदाबाद येथील बडोदा उत्तर प्रदेश ग्रामीण बँकेच्या कॅशिअरनं तब्बल ४१.२२ लाखांचा घोळ केला. हे पैसे त्यानं सट्टेबाजीत उडवले असल्याचं समोर आलं आहे. फकीराबादचे शाखा व्यवस्थापक कृष्ण विहारी श्रीवास्तव यांनी पोलीस स्टेशनला या प्रकरणी तक्रार दिली आहे. शाखेकडे आवश्यकतेपेक्षा अधिक रक्कम होती. १९ डिसेंबरला मंझनपूर शाखेतून मेसेज आला त्याद्वारे ३० लाख काढण्यात आल्याची माहिती मिळाली. मात्र, दुसऱ्या दिवशी रक्कम पाठवण्याचा प्रश्न आला त्यावेळी कॅशिअर अमित कुमार पांडेय यानं बँकेत पैसे कमी असल्याचं म्हटलं. यानंतर व्यवस्थापकानं पैसे मोजले. यावेळी तब्बल ४१ लाख रुपये कमी असल्याचं समोर आलं. ही माहिती वरिष्ठ अधिकाऱ्यांना देण्यात आली. बँकेच्या वरिष्ठ अधिकाऱ्यांनी या संदर्भात चौकशी केली असता कॅशिअरनं दिशाभूल करण्याचा प्रयत्न केला. मात्र, पुढील चौकशीत त्यानं रक्कम सट्टेबाजीसाठी वापरल्याचं मान्य केलं. ही माहिती मिळताच वरिष्ठ अधिकाऱ्यांनी या प्रकरणाची पोलीस स्टेशनला तक्रार करण्याचं ठरवलं. पोलिसांनी आरोपी अमित कुमार पांडेय यांना अटक केली असून चौकशी सुरु करण्यात आली आहे.
