: जळगावमधील नशिराबाद येथे झालेल्या एका विचित्र अपघातात महिलेचा मृत्यू झाला आहे. मृत्युमुखी पडलेली ही महिला दुचाकीवरून प्रवास करत होती. दोन दुचाकींमध्ये धडक होऊन ही महिला रस्त्यावर पडली. रस्त्यावर पडल्यानंतर मागून भरधाव वेगाने येणाऱ्या ट्रकने महिलेला चिरडल्याची दुदैवी घटना मंगळवारी सायंकाळी ५ वाजेच्या सुमारास घडली. जळगाव तालुक्यातील गोदावरी हॉस्पीटलच्या पुढे नशिराबाद गावानजिक हा झाला. जुबेदा बेग अल्ताफ बेग (वय ४८ वर्षे) असे मृत महिलेचे नाव आहे. डोळ्यादेखत आईच्या भयानक मृत्यूने मुलगा सून्न झाला होता. जळगाव शहरातील समता नगरात जुबेदा बेग अल्ताफ बेग ह्या पती व दोन मुलांसह वास्तव्याला होत्या. मंगळवारी सकाळी जुबेदा बेग ह्या मुलगा कमीन बेग अल्ताफ बेग याच्या सोबत दुचाकीने रावेर तालुक्यातील सावदा येथे नातेवाईकांकडे साखरपुडाच्या कार्यक्रमासाठी गेल्या होत्या. साखरपुड्याचा कार्यक्रम आटोपल्यानंतर सायंकाळी जुबेदा बेग ह्या मुलासह दुचाकीने जळगावकडे येण्यासाठी निघाल्या. क्लिक करा आणि वाचा- सायंकाळी ५ वाजण्याच्या सुमारास गोदावरी हॉस्पिटलच्या पुढे नशिराबाद गावाजवळ महामार्गावर समोरून येणाऱ्या दुचाकीने जुबेदा बेग यांच्या दुचाकीला धडक दिली. या अपघातात जुबेदा बेग ह्या महामार्गावर पडल्या. तितक्यात मागून भरधाव वेगाने येणाऱ्या ट्रकच्या चाकाखाली येऊन चिरडल्या गेल्याने त्यांचा जागीच मृत्यू झाला. क्लिक करा आणि वाचा- तर, मुलगा कमीन बेग हा गंभीररित्या जखमी झाला आहे. त्याला जवळच असलेल्या गोदावरी हॉस्पिटलमध्ये दाखल करण्यात आले. दरम्यान, घटनेची माहिती मिळाल्यानंतर नशिराबाद पोलीसांनी घटनास्थळी धाव घेत स्थानिक नागरिकांच्या मदतीने मृतदेह शासकीय वैद्यकीय महाविद्यालयात रवाना केला. क्लिक करा आणि वाचा- अपघाताची माहिती मिळाल्यानंतर नातेवाईकांनी शासकीय वैद्यकीय महाविद्यालयात मोठी गर्दी केली होती. मयत महिलेच्या पश्चात पती, दोन मुले आणि दोन विवाहित मुली असा परिवार आहे. याप्रकरणी नशिराबाद पोलीस ठाण्यात उशीरापर्यंत गुन्हा दाखल करण्याचे काम सुरू होते.
