सोलापूर : सोलापूर शहरातील चिप्पा मार्केट येथे रविवारी सकाळी एका ट्रक ड्रायव्हरचा मृतदेह छिन्नविच्छिन्न अवस्थेत आढळला होता. डोक्यात फरशी घालून चेहरा विद्रुप करून त्याचा खून करण्यात आला होता. मात्र हा मृतदेह कोणाचा आणि त्याचे नातेवाईक कोण, याबाबतचा शोध सोमवारपर्यंत लागला नव्हता. तपास करत असताना पोलिसांकडून चिप्पा मार्केट, अशोक चौक असे जवळपास ३ किलोमीटरवर अंतरावरील सीसीटीव्ही तपासण्यात आले. सोलापूर क्राईम ब्रँचच्या अधिकाऱ्यांनी सर्व सूत्रे फिरवून वेगवेगळ्या पद्धतीने तपास केला आणि अखेर मृत्यू प्रकरणाचा उलगडा झाला आहे.तपास सुरू असताना एक संशयित इसम हा चिप्पा मार्केटजवळ कागद फेकतानाचे चित्रीकरण पोलिसांच्या हाती लागले. यावरून पोलिसांनी ताबडतोब ती चिठ्ठी त्या जागेवरून ताब्यात घेतली. क्राईम ब्रँचचे अधिकारी एपीआय क्षीरसागर यांनी ती चिठ्ठी घेतली असता ती एका टेलरची चिठ्ठी होती. पोलिसांनी सदर टेलरकडे विचारपूस केल्यानंतर मृताची ओळख पटली. बबलू हुंडेकरी (रा,पद्मा नगर, अक्कलकोट रोड सोलापूर) असे मृताचे नाव असल्याचं स्पष्ट झालं. त्यानंतर पोलिसांनी सदर व्यक्तीच्या नातेवाईकांकडून याबाबत सविस्तर माहिती घेतली व बबलू हुंडेकरीच्या मारेकऱ्यास २४ तासांच्या आत जेरबंद केले. सीसीटीव्ही बारकाईने तपासून आरोपीच्या मुसक्या आवळल्या क्राईम ब्रँचचे वरिष्ठ पोलीस निरीक्षक सुनील दोरगे यांनी माहिती देताना सांगितले की, पोलिसांनी चिप्पा मार्केटजवळील सर्व सीसीटीव्ही कॅमेरे तपासले. यामध्ये मृत बबलू हुंडेकरीसोबत एक संशयी इसम चिप्पा मार्केटकडे येताना दिसत आहे. जाताना मात्र एकच व्यक्ती दिसत होता. सदर संशयित इसम हा खून करुन तीन वेळा घटनास्थळावर येऊन पाहणी करत होता. शेवटच्या फेरीत जाताना त्याने एक चिठ्ठी फेकली होती. हे सर्व दृश्य सीसीटीव्ही कॅमेरात कैद झाले होते. पोलिसांनी हाच धागा पकडून मृताची ओळख समोर आणली आणि त्याच्या नातेवाईकांना खबर दिली व संशयित आरोपीच्या मुसक्या आवळल्या.मृत बबलूने टेलरकडे कपडे शिवायला टाकले होतेट्रक ड्रायव्हर बबलू हुंडेकरी याने १४ जानेवारी रोजी सोलापूर शहरातील कर्णिक नगर येथील एका टेलरकडे कपडे शिवायला टाकले होते. टेलरने त्याची पोच पावती बबलूला दिली होती. एक संशयित इसम चिप्पा मार्केट येथे खून झालेल्या ठिकाणी तीन वेळा घुटमळत आहे आणि जाताना एक कागद फेकत आहे, हे दृश्य पाहून पोलिसांना संशय आला आणि सदर ठिकाणी जाऊन पोलिसांनी चिठ्ठी जप्त केली आणि ही चिठ्ठी थेट आरोपीपर्यंत घेऊन गेली.दरम्यान, या खुनाचा तपास लावण्यात एपीआय संजय क्षीरसागर,महेश शिंदे,राजू मुदगल,कुमार शेळके,कृष्णात कोळी,निळोफर तांबोळी,सतीश काटे यांनी महत्वपूर्ण भूमिका बजावली आहे.क्राईम ब्रँचचे अधिकारी सुनील दोरगे यांनी माहिती देताना सांगितले की,बसवराजने बबलूचा खून का केला,यामागे काय कारण आहे,याचा करत आहेत.
