नवी दिल्ली: देशभरात अनेक महिन्यांपासून पेट्रोल आणि डिझेलच्या दरात कोणताही बदल झालेला नाही, मात्र ही स्थिती आता लवकरच बदलू शकते. याचे कारण तेल कंपन्यांना पेट्रोलवर प्रतिलिटर १० रुपये नफा होत आहे. मात्र असे असले तरी सध्या ते पूर्वीचे नुकसान भरून काढण्याचा प्रयत्न करत आहेत. त्यामुळे पेट्रोलचे किरकोळ दर कमी झालेले नाहीत. मात्र तरीही कंपन्यांना डिझेलच्या विक्रीवर प्रतिलिटर ६.५ रुपये तोटा सहन करावा लागत आहे. सार्वजनिक क्षेत्रातील तेल विपणन कंपन्या, इंडियन ऑइल कॉर्पोरेशन (आयओसी), भारत पेट्रोलियम कॉर्पोरेशन लिमिटेड (बीपीसीएल) आणि हिंदुस्तान पेट्रोलियम कॉर्पोरेशन लिमिटेड (एचपीसीएल) यांनी गेल्या वर्षी मे महिन्यापासून पेट्रोल आणि डिझेलच्या किमतींमध्ये सुधारणा केलेली नाही. मात्र, या काळात कच्च्या तेलाच्या किमतीत मोठी घट झाली आहे. केंद्र सरकारने मे महिन्यात पेट्रोल आणि डिझेलवरील उत्पादन शुल्कात कपात केली होती. ICICI सिक्युरिटीजच्या एका अहवालानुसार, "२४ जून २०२२ रोजी संपलेल्या आठवड्यात पेट्रोलवर प्रति लिटर १७.४ रुपये आणि डिझेलवर २७.७ रुपये प्रति लीटरचा विक्रमी तोटा झाल्यानंतर तिसऱ्या तिमाहीत (ऑक्टोबर-डिसेंबर २०२२) पेट्रोलच्या विक्रीवर प्रति लिटर १० रुपये नफा झाला. दुसरीकडे, डिझेलवरील तोटा ६.५ रुपये प्रति लिटरवर आला आहे. तिन्ही कंपन्यांनी ६ एप्रिल २०२२ पासून पेट्रोल आणि डिझेलच्या दरात बदल केलेला नाही." कच्च्या तेलाचे दर किती घसरले रशिया आणि युक्रेन युद्धामुळे कच्च्या तेलाची किंमत १३९ डॉलर प्रति बॅरलवर पोहोचली होती. पण अलिकडच्या काही महिन्यांत त्यात लक्षणीय घट झाली आहे. या महिन्यात किंमत ७८.०९ डॉलरवर घसरली आहे. त्यामुळे दुसऱ्या तिमाहीत विक्रमी नुकसान झाल्यानंतर या तीन कंपन्या नफ्यात येऊ शकतात, अशी आयसीआयसीआय सिक्युरिटीजने आशा व्यक्त केली. तसेच पेट्रोलियम मंत्री हरदीप सिंग पुरी यांनीही अलीकडेच पेट्रोलियम कंपन्यांचे नुकसान अद्याप भरून निघालेले नसल्याची पुष्टी केली. मेट्रो शहरातील पेट्रोल-डिझेलचे दर दरम्यान, देशाची आर्थिक राजधानी मुंबईत पेट्रोलचा दर प्रतिलिटर १०६.३१ रुपये तर डिझेलचा दर ९४.२७ रुपये प्रतिलिटर आहे. याशिवाय शुक्रवारी देशाची राजधानी दिल्लीत पेट्रोल ९६.७२ रुपये आणि डिझेल ८९.६२ रुपये प्रति लिटर दराने विकले जात आहे. तर चेन्नईमध्ये पेट्रोल प्रति लिटर १०२.६३ रुपये आणि डिझेल ९४.२४ रुपये प्रति लिटर दराने उपलब्ध आहे. त्याचवेळी कोलकातामध्ये पेट्रोल १०६.०३ रुपये प्रति लिटर आणि डिझेल ९२.७६ रुपये प्रति लिटर दराने विकले जात आहे.
