बुलढाणा : बुलढाणा जिल्ह्यातील मलकापूर येथून जाणाऱ्या मुंबई-नागपूर महामार्गावर भरधाव कंटेनरच्या धडकेत ३२ वर्षीय युवक ठार झाला आहे. ही घटना राष्ट्रीय महामार्गावर कोल्हे पेट्रोल पंपाजवळ ७ मार्च रोजी दुपारी दीड वाजताच्या सुमारास घडली. याप्रकरणी शहर पोलिसांनी कंटेनर चालकावर गुन्हा दाखल केला आहे.याबाबतची अधिक माहिती अशी की, तालुक्यातील वाघुड येथील रहिवासी देवानंद निनाजी तायडे हा दुपारी दीड वाजण्याच्या सुमारास रस्ता ओलांडत असताना कोल्हे पेट्रोल पंपाजवळ आर. जे. ०७ जी. डी. १६८९ या क्रमांकाच्या कंटेनरने त्याला धडक दिली. यावेळी कंटेनरने फरफटत नेल्याने गंभीर जखमी झालेल्या देवानंद तायडे या तरुणाचा जागीच मृत्यू झाला. या अपघाताप्रकरणी शहर पोलिसांनी मृतकाचा भाऊ सचिन निनाची तायडे यांनी दिलेल्या फिर्यादीवरून कंटेनर चालकाविरुद्ध गुन्हा दाखल केला आहे. घटनेचा तपास पोलीस उपनिरीक्षक सुरेश रोकडे करीत आहेत.दरम्यान, जिल्ह्यात एकीकडे समृद्धी महामार्गावर अपघात होत असताना जिल्ह्यातील राष्ट्रीय महामार्गावर देखील अपघाताचं सत्र थांबत नसल्याचं चित्र आहे. मुख्यतः ग्रामीण भागातून जिथे शहरी भागाला हे राष्ट्रीय महामार्ग जोडलेले असतात त्यावर दुचाकीला होणाऱ्या अपघातांचं प्रमाण मोठं आहे. राष्ट्रीय महामार्गावर रस्ता गतिरोधक, वाहनांची वेगमर्यादा याबाबतच्या सूचना दिलेल्या असतात. मात्र तरीदेखील अनियंत्रित वेगामुळे अशा दुर्घटना वाढत असल्याचं पाहायला मिळत आहे.
