सातारा : साताराशहरापासून जवळच असलेल्या सातारा - कास मार्गावर यवतेश्वर घाटाच्या उतारावर झाल्याने भरधाव डंपर कठडा तोडून डोंगराला धडकला. या अपघातात डंपरचालकाचा जागीच मृत्यू झाला. हा अपघात दुपारच्या सुमारास घडला. शिवशंकर संभाजी भोसले (वय ३०, मूळ रा. ओस चालबुगी, जि. लातूर) असे अपघातात मृत्यू झालेल्या चालकाचे नाव आहे.याबाबत पोलिसांनी दिलेली माहिती अशी की, शिवशंकर भोसले हा डंपरमध्ये (एमएच ११ बीएल २६८०) साहित्य घेऊन तो दुपारच्या दरम्यान कास परिसरात गेला होता. साहित्य सोडून चालक भोसले हा साताराकडे येत असताना यवतेश्वर घाटातून पावर हाऊसजवळ आल्यानंतर त्याच्या डंपरचा ब्रेक फेल झाला. ही बाब चालक भोसले यांच्या लक्षात आली मात्र घाटात तीव्र उतार असल्यामुळे डंपरचा वेग वाढला. घाटाच्या डाव्या बाजूला दरी तसेच काही घरे आहेत. त्यामुळे डंपरचालक शिवशंकर याने प्रसंगावधान राखत मोठा अनर्थ टाळण्यासाठी त्याने उजव्या बाजूला असलेल्या डोंगराला डंपर धडकवला. डंपरचा वेग जास्त असल्याने डोंगराला तो जोरात धडकला. या धडकेत चालक गंभीर जखमी होऊन जागीच ठार झाला. या घटनेची माहिती मिळताच परिसरातील नागरिक मदत कार्यासाठी धावले. हा अपघात झाला, त्यावेळी सुदैवाने बामणोलीहून रुग्णवाहिका रुग्णास घेऊन येत होती. त्या रुग्णवाहिकेतून चालक शिवशंकर याला जिल्हा शासकीय रुग्णालयात दाखल करण्यात आले. मात्र, उपचारापूर्वीच त्याचा मृत्यू झाल्याचे डॉक्टरांनी घोषित केले. सातारा तालुका पोलिस ठाण्यात या अपघाताची रात्री उशिरापर्यंत नोंद झाली नव्हती.
