म. टा. विशेष प्रतिनिधी, मुंबई : करोना रुग्णांची वाढती संख्या लक्षात घेऊन आता दुबई आणि चीनमधून येणाऱ्या प्रवाशांची करोना चाचणी करण्यात येणार आहे. यापूर्वी परदेशातून येणाऱ्या दोन टक्के प्रवाशांची विमानतळावर तपासणी करण्यात येत होती.रुग्णसंख्येत होणारी वाढ लक्षात घेऊन दुबई व चीनमधून राज्यात दाखल होणाऱ्या प्रवाशांची चाचणी करण्यात येणार आहे. मागील काही दिवसांपासून चीन आणि दुबईमधून येणाऱ्या प्रवाशांची करोना चाचणी पॉझिटिव्ह येत आहे. त्यामुळे अखेर येथील प्रवाशांची चाचणी बंधनकारक करण्याच्या सूचना करोना कृती दलाच्या राज्य सरकारला दिल्या आहेत. केंद्र सरकारने दिलेल्या सूचनेनुसार २४ डिसेंबर, २०२२पासून राज्यातील मुंबई, पुणे आणि नागपूर आंतरराष्ट्रीय विमानतळावर प्रवाशांचे सर्वेक्षण सुरू करण्यात आले आहे. ४३ नमुन्यांची तपासणी३० मार्चपर्यंत ३५ हजार ९४७ प्रवाशांची करोना चाचणी करण्यात आली असून, त्यातील ४३ नमुने जनुकीय क्रमनिर्धारणासाठी पाठविण्यात आले आहेत. या ४३ रुग्णांपैकी दहा रुग्ण पुणे, आठ रुग्ण मुंबई, प्रत्येकी एक रुग्ण नवी मुंबई, अमरावती, सांगली, औरंगाबाद व सातारा, पाच रुग्ण गुजरात, प्रत्येकी तीन रुग्ण उत्तर प्रदेश आणि केरळ, प्रत्येकी दोन रुग्ण तमिळनाडू, राजस्थान, प्रत्येकी एक रुग्ण गोवा, आसाम व तेलंगणमधील आहे. देशात वाढत असलेल्या करोना रुग्णांच्या पार्श्वभूमीवर केंद्रीय आरोग्य मंत्रालयाने सर्व राज्य सरकारांना सतर्क राहण्याचे आदेश दिले आहेत. त्यानुसार महाराष्ट्र सरकारने नुकतेच सर्व अधिकारी आणि करोना राज्य कृती दलासोबत आढावा बैठक घेतली. या बैठकीमध्ये हा निर्णय घेण्यात आला.
