म. टा. वृत्तसेवा, नवी मुंबई : मद्यधुंद अवस्थेत असलेल्या ट्रकचालकाचे ट्रकवरील नियंत्रण सुटल्याने धावत्या ट्रकमधून उडी टाकण्याचा केलेला प्रयत्न चालकाच्या जीवावर बेतल्याची घटना मंगळवारी सकाळी वावंजे ते मलंगगड या रस्त्यावर घडली. अशी आहे घटनातळोजा पोलिसांनी या अपघाताला ट्रकचालकाला जबाबदार धरून त्याच्या विरोधात गुन्हा दाखल केला आहे. या अपघातातील मृत ट्रकचालकाचे नाव सोनू भारत लाल (२६) असे असून तो प्रकाश लंके यांच्या मालकीच्या ट्रकवर चालक म्हणून काम करत होता. सोनू हा सोमवारी रात्री तळोजा एमआयडीसीमध्ये ट्रक घेऊन गेला होता. त्यावेळी त्याने रात्री खूप मद्यप्राशन केले होते. सकाळी आठच्या सुमारास सोनू हा नशेत असताना तो ट्रक घेऊन निघाला होता. यावेळी तो वावंजे ते मलंगगड रोडवर नितळस गावाकडे जाणाऱ्या कच्च्या रस्त्यावरून ट्रक घेऊन जात असताना, त्याचे ट्रकवरील नियंत्रण सुटले. त्यामुळे हा ट्रक रस्त्याच्या बाजूला असलेल्या झाडीत घुसल्याने सोनूने स्वत:ला वाचविण्यासाठी धावत्या ट्रकमधून उडी टाकण्याचा प्रयत्न केला. मात्र यावेळी त्याचा पाय दरवाजामध्ये अडकल्याने तो अडखळून खाली पडून ट्रकच्या चाकाखाली आला. यात सोनू हा जबर जखमी झाल्याने त्याचा मृत्यू झाला. तळोजा पोलिसांनी घटनास्थळी धाव घेऊन त्याचा मृतदेह शवविच्छेदनासाठी रुग्णालयात पाठवला. या अपघातात स्वत: सोनू याने दारूच्या नशेत असताना बेदरकारपणे ट्रक चालवून नेला. त्यामुळे तो ट्रकमधून स्वत:च्या चुकीने खाली पडल्याने त्याचा मृत्यू झाल्याचे आढळल्याने तळोजा पोलिसांनी या ट्रकचालकाविरोधात गुन्हा दाखल केला आहे.
