मुंबई : राज्यातील विविध रस्त्यांवर तब्बल १,००४ अपघातप्रवण क्षेत्र (ब्लॅकस्पॉट) आढळून आले आहेत. यासंदर्भातील यादी नुकतीच परिवहन विभागाने सार्वजनिक बांधकाम विभागाकडे दिली असून, यासंदर्भात योग्य ती कार्यवाही करण्याची सूचना संबंधितांना देण्यात आल्या आहेत. विशेष म्हणजे, राष्ट्रीय महामार्गावर सर्वाधिक ६१० ‘ब्लॅकस्पॉट’ची नोंद करण्यात आली आहे, तर मुंबईत ही संख्या ४८ इतकी नोंदवण्यात आली आहे.राज्याच्या परिवहन विभागातर्फे विविध महामार्ग, रस्त्यांवरील अपघातांची ठिकाणे निश्चित करून ‘ब्लॅकस्पॉट’ ठरविले जातात. त्यानंतर या ठिकाणांची यादी सार्वजनिक बांधकाम विभागांकडे सुपूर्द केली जाते. त्यानुसार काही दिवसांपूर्वीच परिवहन विभागाने यादी निश्चित करून माहिती दिली आहे. या ‘ब्लॅकस्पॉट’ची नोंद करून त्याठिकाणी रस्त्याचे रुंदीकरण करणे, दिशादर्शन फलक लावणे व इतर व्यवस्थापन करण्यासह खबरदारीच्या उपाययोजना करण्याच्या सूचना दिल्या जातात.सर्वाधिक ब्लॅकस्पॉट नगर जिल्ह्यातया यादीनुसार राष्ट्रीय महामार्गावर एकूण ६१० ठिकाणे ‘ब्लॅकस्पॉट’ म्हणून घोषित करण्यात आली आहेत. त्यात सर्वाधिक म्हणजे ४५ नगर येथे आढळून आली आहेत. याशिवाय संभाजीनगरमध्ये २१, नागपूर शहर १३, नाशिक शहर १७, नवी मुंबई १५, पुणे शहर १३, सोलापूर २१, ठाणे शहर १५, पिंपरी-चिंचवड १७, अमरावती ग्रामीण १६, औरंगाबाद ग्रामीण १५, बीड १२, चंद्रपूर ११, धुळे ३४, जालना १३, कोल्हापूर १५, नागपूर ग्रामीण ३७, नांदेड ४०, नंदुरबार ३०, नाशिक ग्रामीण ३७, पुणे ग्रामीण ९, पालघर ११, रायगड २१, रत्नागिरी ६, सांगली १५, सातारा ३५, सोलापूर ग्रामीण ३७, ठाणे ग्रामीण ९, वर्धा १५, आदींचा समावेश आहे. तर, राज्य महामार्गावर २०२ ठिकाणी ‘ब्लॅकस्पॉट’ आढळून आले आहेत.मुंबईत ४८ ठिकाणे धोकादायकमुंबईत जवळपास ४८ ठिकाणे ‘ब्लॅकस्पॉट’ म्हणून निश्चित करण्यात आली आहेत. त्यात मरिन ड्राइव्ह येथील मेघदूत ब्रिज, वरळी येथील सिटी बेकरी, दादर येथील फुल मार्केट, माहीम येथील माहीम फाटक, धारावी येथील सायन-वांग्रे लिंक रोड, चेंबूर येथील चेंबूर नाका, पंतनगर येथील रमाबाईनगर बस थांबा, हाजीअली जंक्शन, मानखुर्द येथील घाटकोपर-मानखुर्द लिंक रोड अशा अनेक ठिकाणांचा समावेश आहे.१२० ‘ब्लॅकस्पॉट’ची कामे पूर्णपरिवहन विभागाने सार्वजनिक विभागाला दिलेल्या आकडेवारीनुसार. राष्ट्रीय महामार्गावरील ६१०पैकी १२० ‘ब्लॅकस्पॉट’ची कामे पूर्ण करण्यात आली आहेत, तर ८४ ‘ब्लॅकस्पॉट’ची कामे सुरू असून लवकरच ती पूर्ण करण्यात येणार आहेत. ही कामे करण्यासाठी तीन संस्थांकडे जबाबदारी देण्यात येते. यात एचएआय, एमएसआरडीसी, एनएच (पीडब्लूडी) यांचा समावेश आहे. राज्यातील ‘ब्लॅकस्पॉट’- राष्ट्रीय महामार्ग : ६१०- राज्य महामार्ग : २०२- एकूण : १००४
