वृत्तसंस्था, लंडन :भारताविरुद्धच्या जागतिक कसोटी अजिंक्यपद स्पर्धेच्या अंतिम लढतीसाठी संघ सज्ज झाला आहे. मैदानावरील तयारीसोबतच ऑस्ट्रेलियाने भारताच्या विराट कोहलीला झटपट रोखण्यासाठी योजना आखली आहे; कारण ऑस्ट्रेलियासाठी विराट नेहमीच डोकेदुखी ठरला आहे. जागतिक कसोटी अजिंक्यपद स्पर्धेच्या अंतिम फेरीला सात जूनपासून लंडनमधील ‘दी ओव्हल’ स्टेडियममध्ये सुरुवात होत असून या आव्हानात्मक लढतीत भारताला आव्हानात्मक ऑस्ट्रेलियाचा सामना करायचा आहे.भारताने जसे ऑस्ट्रेलिया संघाचा अभ्यास करून डावपेचांचे नियोजन केले आहे. आपल्या संघातील शिलेदारांना भूमिका वाटून दिल्या आहेत. तशीच लगबग ऑस्ट्रेलिया संघातही सुरू असून शुभमन गिल, चेतेश्वर पुजारा यांच्यासह विराट कोहलीची विकेट झटपट मिळविण्यासाठी ऑस्ट्रेलियाने खास डावपेच आखले आहेत. रोहित शर्मा-शुभमन गिल या सलामी जोडीनंतर तिसऱ्या क्रमांकावर फलंदाजीस येऊ शकतो. मागील काही कसोटींत कोहलीची कामगिरी भलेही साजेशी झालेली नाही. मात्र, यावर्षीच्या इंडियन प्रीमियर लीगद्वारे (आयपीएल) विराटने चमकदार कामगिरी करून ‘फॉर्म’ परत मिळवला आहे.तांत्रिकदृष्ट्या टी-२० आणि कसोटी हे दोन्ही प्रकार वेगळे असले, तरी अनुभवी विराट कोहलीला परिस्थितीशी जुळवून घेणे पटकन जमते, याची जाणीव ऑस्ट्रेलियाला आहे. त्यानुसार ऑस्ट्रेलियासाठी कोहलीला रोखणे महत्त्वाचे असल्याचे ऑस्ट्रेलियाचा फलंदाज स्टीव्ह स्मिथने अलीकडेच सांगितले. याआधी गेल्याच आठवड्यात रिकी पाँटिंगनेही ऑस्ट्रेलियाला विराटबाबत सजग केले आहे.या वर्षी जानेवारीत मायदेशात झालेल्या चार सामन्यांच्या कसोटी मालिकेत कोहलीने ऑस्ट्रेलियाविरुद्ध १२, ४४, २०, २२, १३, १८६ धावा केल्या आहेत. गेल्या वर्षात मात्र कोहलीचा कसोटीचा फॉर्म हरपला होता. त्याला गेल्या वर्षी सहा कसोटींत केवळ २६५ धावा करता आल्या होत्या. यात केवळ एका अर्धशतकाचा समावेश होता. मात्र, कोहलीने आयपीएलमध्ये १४ सामन्यांत ५३.२५च्या सरासरीने ६३९ धावा केल्या आहेत. यात दोन शतकांचा समावेश आहे.इंग्लंडमधील हवामान सध्या कोरडे आहे. पुढील आठवड्यात मोठ्या पावसाची शक्यता नाही. ‘दी ओव्हल’वर चेंडूला उसळी मिळण्याची शक्यता आहे. कोहलीच्या शैलीसाठी सध्या तरी इंग्लंडमधील वातावरण पोषक आहे.
