नागपूर: रविवारी दुपारपासून बेपत्ता असलेल्या सात वर्षीय विद्यार्थ्याचा सोनेगाव तलावात बुडून मृत्यू झाल्याची धक्कादायक घटना समोर आली आहे. ही खळबळजनक घटना सोमवारी दुपारी उघडकीस आली. साहिल रामप्रसाद राऊत (रा. गजाननधाम झोपडपट्टी, सहकारनगर) असे मृत मुलाचे नाव आहे. पोलिसांनी दिलेल्या माहितीनुसार, साहिलचे वडील रामप्रसाद हे श्रमिक आहेत. त्याची आई आणि मोठी बहीण घरकाम करतात. रविवारी सकाळी तिघेही कामावर गेले. साहिल हा घरी होता. खेळता खेळता तो घराबाहेर गेला. दुपारी त्याची आई घरी आली असता साहिल घरी नव्हता. त्याच्या आईने शोध घेतला, मात्र तो आढळून आला नाही. सायंकाळी रामप्रसाद यांनी सोनेगाव पोलिसांत तक्रार केली. पोलिसांनी अपहरणाचा गुन्हा दाखल करून साहिलचा शोध सुरू केला. दरम्यान, नातेवाइकांनी साहिल हा बेपत्ता असल्याची पोस्ट समाजमाध्यमांवरही छायाचित्रासह व्हायरल केली. सोमवारी दुपारी एका नागरिकाला सोनेगाव तलावात मुलाचा मृतदेह तरंगताना आढळला. त्याने सोनेगाव पोलिसांना माहिती दिली. माहिती मिळताच वरिष्ठ पोलीस निरीक्षक बळीराम परदेशी यांच्यासह पोलिसांचा ताफा तेथे पोहोचला. अग्निशमन विभागाच्या जवानांच्या मदतीने मृतदेह बाहेर काढला. पंचनामा केला असता साहिलच्या शरीरावर कोणत्याही जखमेची खूण आढळून आली नाही. आंघोळीसाठी तो तलावात उतरला आणि बुडून त्याचा मृत्यू झाला असावा, अशी शक्यता पोलिसांनी वर्तविली. याप्रकरणी सोनेगाव पोलिसांनी आकस्मिक मृत्यूची नोंद करून तपास सुरू केला आहे.
