मुंबई : ऑगस्ट पावसाअभावी काढल्यानंतर सप्टेंबरवर पावसासाठी आशा केंद्रित झाल्या आहेत. पावसाळी हवेअभावी उन्हाचा तडाखा वाढत आहे. मुंबईतही शुक्रवारी सांताक्रूझ आणि कुलाबा येथील कमाल तापमान ३२ अंशांपलीकडे होते. पावसाळी आर्द्रता आणि त्यातच चढ्या तापमानाची भर पडल्याने दैनंदिन कामकाजावरही परिणाम होत आहे. मात्र दक्षिण कोकणामध्ये आणि विदर्भामध्ये शनिवारपासून, मराठवाड्यामध्ये रविवारपासून, उत्तर कोकणात सोमवारपासून अनेक ठिकाणी पावसाला सुरुवात होईल, असा अंदाज असल्याने तापमान दिलाशाचीही अपेक्षा आहे.कोकण विभागामध्ये शुक्रवारी सरासरीपेक्षा अडीच ते तीन अंशांपर्यंत पारा चढा होता. कुलाबा येथे ३२.२ आणि सांताक्रूझ येथेही ३२.३ अंश सेल्सिअस कमाल तापमानाची नोंद झाली. हे तापमान दोन्ही केंद्रांवर २.२ अंशांनी सरासरीहून अधिक होते. सप्टेंबरमध्ये सर्वसाधारणपणे मुंबईत कमाल तापमान ३०.९ अंश सेल्सिअस असते. सप्टेंबरच्या मध्यात किंवा उत्तरार्धात कमाल तापमानाचा पारा ३६ ते ३७ अंशांपर्यंतही पोहोचले आहे. मात्र सध्याच्या मुंबईतील उन्हाचा ताप असह्य असल्याच्या प्रतिक्रिया मुंबईकरांमध्ये उमटत आहेत. शुक्रवारी रत्नागिरी केंद्रावरही कमाल तापमान सरासरीपेक्षा तीन अंशांनी अधिक होते.प्रादेशिक हवामान विभागाने दिलेल्या माहितीनुसार, उत्तर कोकण परिसरात शनिवार आणि रविवारी हलक्या सरींची उपस्थिती असेल तर पुढच्या आठवड्यामध्ये हलक्या ते मध्यम सरींची शक्यता आहे. दक्षिण कोकणामध्ये रविवारपासून पावसाचा जोर किचिंत वाढेल अशी शक्यता आहे. उत्तर महाराष्ट्रातही हलक्या ते मध्यम सरींची शक्यता आहे. तर पश्चिम महाराष्ट्र, मराठवाडा येथे रविवारपर्यंत एखाद-दुसऱ्या ठिकाणी मेघगर्जनेसह पावसाची शक्यता आहे. विदर्भात मात्र शुक्रवारी वर्तवलेल्या अंदाजानुसार मंगळवारपर्यंत सगळ्याच जिल्ह्यांमध्ये तुरळक ठिकाणी मेघगर्जनेसह पावसाची शक्यता आहे. या पावसानंतर तापमानात घट व्हावी अशी अपेक्षा व्यक्त करण्यात येत आहे.राज्य तापले- जळगाव येथे ३६.२ अंश, तापमान सरासरीपेक्षा ५.२ अंशांनी अधिक- सोलापूर येथे ३८ अंश, तापमान सरासरीहून ६.५ अंशांनी अधिक- मध्य महाराष्ट्रात बहुतांश ठिकाणी पारा सरासरीहून चार किंवा अधिक अंशांनी चढा- मराठवाड्यातही कमाल तापमान ३४ ते ३५ अंशांपर्यंत पोहोचले- छत्रपती संभाजीनगर येथे सरासरीहून ५.३ अंशांनी अधिक तापमान- बीड येथे ५.२ अंशांनी कमाल तापमान सरासरीहून अधिक तापमान, पारा ३५.५ अंशांवर- विदर्भात अकोला, अमरावती, ब्रह्मपुरी, चंद्रपूर, नागपूर, वर्धा, यवतमाळ या केंद्रांवर कमाल तापमान ३५ अंशांच्या पुढे- या सर्वच ठिकाणी सरासरीपेक्षा कमाल तापमान ४ अंश किंवा अधिक चढे- यवतमाळमध्ये सरासरीपेक्षा कमाल तापमान ६.८ अंशांनी अधिक
