तेलंगाणा: तेलंगाणाच्या निवडणुकीत धुव्वा उडवल्यानंतर काँग्रेसने रेवंत रेड्डी यांना राज्याचे मुख्यमंत्री घोषित केले आहे. ११९ सदस्यीय विधानसभेच्या राज्यात काँग्रेसने ६४ जागा जिंकून तेलंगाणामध्ये मोठा विजय मिळवला. रेवंत रेड्डी हे नवे मुख्यमंत्री असतील, असे काँग्रेसने सांगितल्यानंतर तेलंगाणात जल्लोषाचे वातावरण निर्माण झाले आहे. एआयसीसीचे सरचिटणीस केसी वेणुगोपाल यांनी रेड्डी यांची काँग्रेस विधिमंडळ पक्षाच्या नेतेपदी निवड झाल्याची घोषणा करताच मंगळवारी सकाळपासून वाट पाहणाऱ्या कार्यकर्त्यांनी राज्यभर फटाके फोडणे आणि मिठाई वाटणे सुरू केलं आहे. काँग्रेस नेते राहुल गांधी यांनी सांगितले की, सर्वोच्च पदासाठी रेवंत रेड्डी यांची निवड करण्यात आली आहे. तेलंगाणाच्या नव्या मुख्यमंत्र्यांचा शपथविधी सोहळा ७ डिसेंबरला होणार आहे. दरम्यान आज संध्याकाळी रेवंत रेड्डी दिल्लीला रवाना झाले आहेत. त्यानंतर त्यांना पक्ष नेतृत्वाला भेटायला बोलावण्यात आले. गांधी, काँग्रेस प्रमुख मल्लिकार्जुन खर्गे आणि राष्ट्रीय सरचिटणीस केसी वेणुगोपाल यांच्यासह दिल्लीत झालेल्या बैठकीत हा निर्णय घेण्यात आला. निर्णय जाहीर होण्यापूर्वी हैदराबादमध्ये काँग्रेस विधिमंडळ पक्षाची बैठक होणार आहे. काँग्रेसच्या विजयी मोहिमेचा चेहरा असलेले ५४ वर्षीय रेड्डी यांना मुख्यमंत्री पदापर्यंतच्या प्रवासात पक्षातूनच तीव्र विरोधाचा सामना करावा लागला. काल संध्याकाळी होणारा शपथविधी सोहळा राज्य काँग्रेसच्या काही दिग्गजांनी मुख्यमंत्रीपदासाठी रेड्डी यांच्या निवडीला विरोध केल्यानंतर रद्द करण्यात आला. या आंदोलकांमध्ये माजी राज्य काँग्रेसचे प्रमुख एन उत्तम कुमार रेड्डी, माजी सीएलपी नेते भट्टी विक्रमार्का, माजी मंत्री कोमातिरेड्डी व्यंकट रेड्डी, माजी उपमुख्यमंत्री दामोदर राजनरसिंह यांचा समावेश आहे. प्रलंबित भ्रष्टाचाराची प्रकरणे आणि रेड्डी यांच्या लोकसभा मतदारसंघात काँग्रेसच्या खराब प्रदर्शनाकडे लक्ष वेधून त्यांनी रेवंत रेड्डी यांच्या उमेदवारीला स्पष्टपणे विरोध केला. कोण आहेत रेवंत रेड्डी?८ नोव्हेंबर १९६९ रोजी महबूबनगर जिल्ह्यातील कोंडारेड्डी पल्ली येथे जन्मलेले रेड्डी हे उस्मानिया विद्यापीठाच्या एव्ही कॉलेजमधून कला शाखेचे पदवीधर आहेत. विद्यार्थीदशेत ते उजव्या विचारसरणीच्या ABVP (अखिल भारतीय विद्यार्थी परिषद) शी संबंधित होते. अभ्यास पूर्ण झाल्यानंतर रेवंतने प्रिंटिंग प्रेसच्या रूपाने एक उपक्रम सुरू केला.
