वृत्तसंस्था, ढाका : बांगलादेशात रविवारी सार्वत्रिक निवडणूक होत आहे. प्रमुख विरोधी पक्ष असलेल्या ‘बांगलादेश नॅशनलिस्ट पक्षा’ने (बीएनपी) निवडणुकीवर बहिष्कार टाकला आहे. त्यामुळे विद्यमान पंतप्रधान शेख हसीना यांचा सलग चौथ्यांदा पंतप्रधान होण्याचा मार्ग मोकळा झाल्याचे मानण्यात येत आहे. दरम्यान, या निवडणुकीला विरोध करून ‘बीएनपी’ने शनिवारपासून ४८ तासांच्या ‘बंद’ची हाक दिली आहे.बांगलादेशात तीनशे जागांसाठी मतदान होत आहे. त्यामुळे कडेकोट बंदोबस्त तैनात करण्यात आला आहे. या निवडणुकीत २७ राजकीय पक्षांच्या १५००पेक्षा जास्त उमेदवारांनी अर्ज भरले असून, ४३६ अपक्ष उमेदवार रिंगणात आहेत. यामध्ये जातीय पक्ष हा सर्वांत मोठा विरोधी पक्ष असून, अन्य छोटे पक्ष अवामी लीगची ‘बी टीम’ असल्याची टीका करण्यात येत आहे. ‘बीएनपी’च्या ‘बंद’मुळे शनिवारी दिवसभर वाहनांची वर्दळ तुलनेने कमी होती. जाळपोळ आणि हिंसाचाराची भीती व्यक्त करण्यात येत आहे. अवामी लीगचे सरकार सत्तेवर असताना, निवडणुका घेण्यास ‘बीएनपी’ने विरोध केला आहे. त्यांच्याकडून तीन महिन्यांपासून सातत्याने निवडणुकीविरोधात आंदोलन करण्यात येत आहे.रेल्वे जाळपोळप्रकरणी आरोप-प्रत्यारोपढाका : सार्वत्रिक निवडणुकीच्या पार्श्वभूमीवर, रेल्वेला लागलेल्या आगप्रकरणी प्रमुख विरोधी पक्ष असणाऱ्या बांगलादेश नॅशनलिस्ट पक्षाच्या (बीएनपी) प्रमुख नेत्यासह आठ जणांना अटक करण्यात आली आहे. या घटनेमध्ये चार जणांचा मृत्यू झाला होता. नबी उल्लाह नबी असे अटक केलेल्या ‘बीएनपी’च्या नेत्याचे नाव असून, तो दक्षिण ढाक्याचा संयुक्त निमंत्रक आहे. या घटनेवरून राजकीय पक्षांमध्ये आरोप-प्रत्यारोप होत आहेत. ही घटना म्हणजे घातपात आहे, असे ‘बीएनपी’चे संयुक्त सरचिटणीस रुहुल कबीर रिझवी यांनी म्हटले आहे. पंतप्रधान शेख हसीना यांनी या घटनेवर शोक व्यक्त केला आहे; तसेच या प्रकरणाचा तपास करण्याचा आदेश दिला आहे.
