नागपूर: ऑल इंडिया इन्स्टिट्यूट ऑफ मेडिकल सायन्सेस (एम्स) येथे सोमवारी एका रुग्णाने पाचव्या मजल्यावरून उडी मारून आत्महत्या केली. ही घटना सोमवारी पहाटे पाचच्या सुमारास घडली. ७१ वर्षीय नामदेव लानुजी मोहोड, रा. भिवापूर असे मृताचे नाव आहे. मृतक हा मांगली गावतील रहिवासी होता. मृतकाला काही दिवसांपूर्वी कुटुंबीयांनी शस्त्रक्रियेसाठी एम्समध्ये दाखल केले होते. त्याच्या यकृतावरील मांस वाढले होते. त्याच्यावर शस्त्रक्रिया होणार होती. त्यांना पाचव्या मजल्यावरील जनरल सर्जरी वॉर्ड क्रमांक ५०३ मध्ये दाखल करण्यात आले होते. सोमवारी पहाटे पाचच्या सुमारास त्याने अचानक खिडकीतून खाली उडी मारून आत्महत्या केली. मात्र त्यांनी उडी मारली की पडले हे समजू शकले नाही. या घटनेने एम्समध्ये खळबळ उडाली आहे. डॉक्टरांनी त्यांना तपासून मृत घोषित केले. दरम्यान एम्समध्ये घडलेली ही दुसरी घटना आहे. यापूर्वी २०२२ मध्ये एका रुग्णाने येथून उडी मारून आत्महत्या केली होती. हा रुग्ण वॉर्ड क्रमांक ५०५ मध्ये दाखल होता. या घटनेनंतर रुग्णालय प्रशासन आणि वैद्यकीय अधीक्षक कार्यालयाने इमारतीची देखभाल करणाऱ्या अधीक्षक अभियंत्यांना खिडक्यांवर ग्रील्स बसविण्याच्या सूचना केल्या होत्या. मात्र दोन वर्षे झाली तरी येथे ग्रील बसविण्यात आलेले नाही. दोन वर्षे झाली तरी येथे ग्रील बसविण्यात आलेले नाही. आता रुग्णाने आत्महत्या केल्याची दुसरी घटना समोर आली आहे. उपचाराला कंटाळून मृतकाने हे पाऊल उचलल्याचे पोलिसांचा प्राथमिक अंदाज आहे. सोनेगाव पोलीस पुढील तपास करत आहे.
