पुणे: पुण्यात बुधवारी झालेल्या पावसामुळे हाहा:कार उडाला असून अनेक रस्ते, नाले पाण्याखाली गेले आहेत. या पावसामुळे पुण्यात आतापर्यंत १४ जणांचा बळी गेला आहे. रात्रभर पावसाने झोडपून काढल्याने घाबरलेल्या नागरिकांना रात्र जागून काढावी लागली होती. आजही रात्रीही पुण्यात मुसळधार पडणार असल्याचा अंदाज हवामान खात्याने वर्तवला असून पुणेकरांसाठी आजची रात्रही वैऱ्याची ठरण्याची शक्यता दिसत आहे. पुण्यात काल सकाळपासून पावसाने जोरदार हजेरी लावत अक्षरश: धुमाकूळ घातला होता. त्यामुळे पुण्यातील काही भागात पाणी साचले होते. अनेक ठिकाणी तर पूरसदृश्य परिस्थिती निर्माण झाली होती. घराघरांमध्ये पाणी शिरतानाच अनेक वाहने सुद्धा पाण्याखाली गेली होती. त्यामुळे येथील नागरिकांना अक्षरश: जीव मुठीत घेऊन संपूर्ण रात्र जागून काढावी लागली होती. दरम्यान, आज सकाळी पावसाने उसंत घेतली असली तरी पुणेकरांवरील अस्मानी संकट अद्यापपर्यंत थांबलेलं नाही. आज रात्रीही पुण्यात मुसळधार पाऊस पडणार असल्याचा अंदाज हवामाना खात्याने वर्तवला आहे. त्यामुळे प्रशासनाने पुणेकरांना सतर्क राहण्याच्या सूचना केल्या आहेत. अफवांवर विश्वास ठेवू नका: महापौर दरम्यान, शहर व परिसरात जोरदार पावसामुळे काही ठिकाणी जनजीवन विस्कळीत झाले आहे. आम्ही महापालिकेच्या सर्व यंत्रणांना सतर्क राहण्याचा इशारा दिला आहे. तरी कृपया नागरिकांनी काळजी करू नये तसेच कुठल्याही अफवांवर विश्वास ठेवू नये. याच बरोबर कुणाला कुठल्याही प्रकारची मदत हवी असल्यास माझ्याशी संपर्क करावा, असे आवाहन महापौर मुक्ता टिळक यांनी केले आहे.
