नवी दिल्ली: भाजपचे एक वरिष्ठ नेते आणि राष्ट्रीय स्वयंसेवक संघाच्या एका पदाधिकाऱ्यांच्या हत्येच्या प्रकरणात वाँटेड असलेला हिज्बुल मुजाहिदीनच्या प्रमुख कमांडरचा सुरक्षा दलाने रामबन जिल्ह्यातील चकमकीत खात्मा केला. ओसामा आणि त्याचे सहकारी जाहिद आणि फारुख अशी या चकमकीत ठार झालेल्या तीन दहशतवाद्यांची ओळख पटली आहे. जम्मू-काश्मीरच्या रामबन जिल्ह्यात शनिवारी ही चकमक सुमारे नऊ तास सुरू होती. एकूण तीन दहशतवादी या चकमकीत ठार झाले तर सैन्याचा एक जवान शहीद झाला. अधिकाऱ्यांनी सांगितले की हे तीन्ही अतिरेक्यांनी शनिवारी सकाळी राजमार्गाजवळ चकमक झाल्यानंतर पळ काढला आणि ते मुख्य बाजारातील एका घरात घुसले. तेथेच सैन्य दलाने तिघांना मारले. १ नोव्हेंबर २०१८ रोजी भाजपचे वरिष्ठ नेते अनिल परिहार आणि त्यांचा भाऊ अजित परिहार तसेच एप्रिल २०१९ मध्ये आरएसएस पदाधिकारी चंद्रकांत शर्मा आणि त्यांच्या सेक्रेटरीची हत्या झाली होती. या दोन्ही प्रकरणात ओसामा याचाच हात होता. ओसामावर अनेक लाखांचं इनाम होतं. तो किश्तवाड जिल्ह्यात हत्यात हुसकावून घेण्याच्या प्रकरणातही वाँटेड होता.
