मुंबई: मुंबई-पुणे द्रुतगती मार्गावर उद्या शुक्रवारी दुपारी कमानी बोर्ड बसविण्याचे काम करण्यात येणार असल्याने दुपारी १२ ते २ वाजेपर्यंत या मार्गावरील बंद ठेवण्यात येणार आहे. दोन तास ही वाहतूक बंद राहणार असल्याने प्रवाशांनी पर्यायी मार्गाचा अवलंब करण्याचे आवाहन महाराष्ट्र राज्य रस्ते सुधारणा महामंडळ लिमिटेड (एमएससीआरटी)ने केलं आहे. मुंबई-पुणे द्रुतगती मार्गावर शेंडूग फाटा अगोदर कमानी बोर्ड बसविण्यात येणार आहे. त्यामुळे या मार्गावरून पुण्याकडे जाणारी वाहतूक दुपारी १२ ते २ वाजेपर्यंत बंद ठेवण्यात आली आहे. प्रवाशांना त्रास होऊ नये म्हणून कळंबोली सर्कल-उरण बायपास रोड- टी पॉइंट- पळस्पे फाटा-कोनगाव-कोन पूल- शेडूंग- चौकफाटा- खालपूर व पुन्हा एक्सप्रेस वे असा पर्यायी मार्ग प्रवाशांना देण्यात आला आहे. तसेच कळंबोली सर्कल - खांदा कॉलनी सिग्नल - पनवेल ओहर ब्रीज - तक्का गाव ( पंचमुखी हनुमान मंदिर ) - पळस्पे फाटा - कोन गाव (एन.एच.०४ मार्गे) - कोन ब्रीज - शेंडुंग - चौकफाटा - खालापूर व परत एक्सप्रेस वे असा ही दुसरा पर्यायी मार्ग प्रवाशांसाठी उपलब्ध करून देण्यात आला आहे. प्रवाशांनी या दोन्ही पर्यायी मार्गांचा अवलंब करण्याचं आवाहन महामार्ग पोलीस निरीक्षक सुदाम पाचोरकर यांनी केलं आहे. तसेच कमानी बोर्ड लावण्याचे काम पूर्ण होईपर्यंत अवजड वाहनांना दोन्ही पर्यायी मार्गावर थांबवून ठेवण्यात येणार असल्याचंही सूत्रांनी सांगितलं.
