मुंबई: भारतीय क्रिकेट संघाचा माजी कर्णधार लवकरच बॉलिवूडमध्ये झळकणार असल्याची चर्चा आहे. संजय दत्तच्या 'डॉगहाऊस' या आगामी सिनेमात तो अभिनेता म्हणून दिसेल असं बोललं जातंय. 'डॉगहाऊस' हा मल्टीस्टारर सिनेमा असून त्यात सुनील शेट्टी, इमरान हाश्मी आणि आर. माधवन यांच्यासह धोनीदेखील दिसण्याची शक्यता आहे. क्रिकेटमधील उत्तम करिअर करत मोठ्या पडद्यावर झळकणारा महेंद्रसिंग धोनी हा पहिला क्रिकेटपटू नाही. भारतीय क्रिकेटसंघातील दिग्गज अर्थात सचिन तेंडुलकर, सुनील गावसकर, अजय जडेजा, कपिल देव, अशा अनेकांनी मोठ्या पडद्यावर काम केलं आहे. ‘क्रिकेटचा देव’ मानला जाणाऱ्या सचिन तेंडुलकरच्या आयुष्यावर आधारित 'सचिन: अ बिलियन ड्रीम्स' हा सिनेमा आला. 'कॅप्टन कूल' च्या आयुष्यावर 'एम. एस धोनी: द अनटॉल्ड स्टोरी' हा चित्रपट प्रदर्शित झाला. 'मॅचफिक्सिंग'च्या आरोपामुळं कारकीर्द संपुष्टात आलेल्या मोहंमद अजहरुद्दीन या क्रिकेटपटूवरचा 'अजहर' हा चित्रपटदेखील प्रेक्षकांच्या पसंतीस उतरला. प्रेक्षकांनीही या सगळ्या चित्रपटांना उत्तम प्रतिसाद दिला. मास्टर ब्लास्टर सचिन तेंडुलकर व भारतीय संघाचा माजी कर्णधार महेंद्रसिंह धोनी, मोहंमद अजहरुद्दीन यांच्यावरील चरित्रपटांनतर चर्चा आहे ती भारतीय क्रिकेट संघाच्या दोन माजी कर्णधारांच्या आयुष्यावर बेतलेल्या चित्रपटांची. माजी कर्णधार सौरव गांगुली आणि कपिल देव यांचे बायोपिक लवकरच बॉक्सऑफिसवर धडकणार आहेत. निर्माती-दिग्दर्शिका एकता कपूर हिची बालाजी टेलिफिल्म्स गांगुलीच्या जीवनावरील चित्रपटाची निर्मिती करणार आहे. 'अ सेंच्युरी इज नॉट इनफ' या पुस्तकावर हा चरित्रपट आधारित असेल. सौरभ गांगुली यानं स्वत: हे पुस्तक लिहिलं आहे. क्रिकेटपटू म्हणून गांगुलीला करावा लागलेला संघर्ष यातून पाहायला मिळेल. तर, कपिल देव आणि १९८३च्या विजयावर आधारित '83' हा चित्रपट येऊ घातला आहे. या चित्रपटात बॉलिवूडचा 'गली बॉय' भारतीय क्रिकेट संघाचे माजी कर्णधार कपिल देव यांच्या भूमिकेत दिसणार आहे. भारतीय क्रिकेट संघानं १९८३ मध्ये विश्वचषक जिंकला होता. विश्वचषक विजयाचा तो थरार '83' या सिनेमात अनुभवता येणार आहे. कबीर खान या चित्रपटाचं दिग्दर्शन करणार आहे. सिनेमातील कलाकारांना भारताच्या तत्कालीन संघातील खेळाडू प्रशिक्षण देत आहेत. आर. बद्री, हार्डी संधू, चिराग पाटील, साकिब सलीम, पंकज त्रिपाठी, ताहिर भसीन, ऐमी विर्क, साहिल खट्टर यांच्या या चित्रपटात भूमिका आहेत. पुढील वर्षी एप्रिलमध्ये हा चित्रपट प्रदर्शित होणार आहे. आपल्या लाडक्या क्रिकेटपटूला पडद्यावर पाहण्यासाठी धोनीचे फॅन्स उत्सुक आहेत. त्यामुळे क्रिकेटच्या मैदानावर तुफान फटकेबाजी करणारा हा 'कॅप्टन कूल' आता अभिनेता म्हणून काय कमाल दाखवतोय याची उत्सुकता त्याच्या चाहत्यांना असेल.
