चंदीगडः नुकत्याच पार पडलेल्या हरयाणा विधानसभेच्या निवडणुकीत 'मोदी लाट' ओसरल्याचे स्पष्टपणे दिसले. तर दुसरीकडे काँग्रेस नेते राहुल गांधी यांची 'जादू' दिसली. ज्या ठिकाणी नरेंद्र मोदी यांनी सभा, रॅली केली त्या ठिकाणी भाजपच्या उमेदवारांचा पराभव झाला असून राहुल गांधींनी घेतलेल्या रॅली व सभेच्या ठिकाणी काँग्रेस उमेदवार विजयी झाल्याचे दिसले आहे. हरयाणा राज्यात लोकसभा निवडणुकीत ज्याप्रमाणे 'मोदी मॅजिक' दिसली होती. ती अवघ्या पाच महिन्यात ओसरल्याची स्पष्टपणे दिसले. हरयाणा विधानसभा निवडणुकीत सत्ताधारी भाजपला जोरदार धक्का बसला आहे. या निवडणुकीत भाजपने अब की बार '७५ पार' असे लक्ष्य ठेवले होते. परंतु, भाजपला ४० ही संख्या गाठण्यासाठी मोठी कसरत करावी लागली. हरयाणात ७५ पार हे लक्ष्य गाठण्यासाठी पंतप्रधान नरेंद्र मोदींसह गृहमंत्री अमित शहा, उत्तर प्रदेशचे मुख्यमंत्री योगी आदित्यनाथ, केंद्रीय मंत्री स्मृती ईराणी, खासदार हेमा मालिनी, खासदार सनी देओल, संरक्षणमंत्री राजनाथ सिंह, केंद्रीय मंत्री नितीन गडकरी यांच्यासारख्या दिग्गज नेत्यांसह ४० स्टार प्रचारकांनी हरयाणात प्रचार केला. तरीही भाजपला म्हणावे तितके यश मिळाले नाही. हरयाणा विधानसभा निवडणुकीत काँग्रेसकडून स्टार प्रचारक म्हणून केवळ राहुल गांधी यांनीच प्रचार केला. काँग्रेस नेत्या सोनिया गांधी व प्रियांका गांधी या निवडणुकीत काही खासगी कारणामुळे प्रचारात सहभागी झाल्या नव्हत्या. राहुल गांधी यांनी नूहं आणि महेंद्रगड या दोन ठिकाणी मोठी रॅली केली होती. काँग्रेसला या दोन्ही ठिकाणी विजय मिळवण्यात यश आले आहे. तसेच या रॅलीचा प्रभाव आजुबाजुच्या ठिकाणीही पाहायला मिळाला. या ठिकाणीही काँग्रेसला विजय मिळवता आला. राजस्थानचे मुख्यमंत्री अशोक गहलोत आणि छत्तीसगडचे मुख्यमंत्री भूपेश बघेल, माजी क्रिकेटपटू वीरेंद्र सेहवाग यांनीही हरयाणात काँग्रेससाठी प्रचार केला. पंतप्रधान नरेंद्र मोदी यांनी वल्लभगड येथे रॅली केली होती. या ठिकाणी भाजपला यश मिळाले. परंतु, दादरीत अपक्षाला विजय मिळाला. ऐलनाबादमध्ये भाजप पराभूत झाला. रेवाडीत मोदींची सभा झाली. पण या ठिकाणी काँग्रेसला विजय मिळाला. गोहानामध्ये मोदींची रॅली झाली. परंतु, या ठिकाणीही काँग्रेसला विजय मिळाला. गृहमंत्री अमित शहा यांनी कैथल, लोहारू आणि पानीपत या ठिकाणी रॅली केली. या तीनही जागेवर भाजपला विजय मिळाला. परंतु, महम आणि बहादूरगड मध्ये सभा घेऊनही या ठिकाणी भाजपला पराभव स्वीकारावा लागला. टोहाना, रतिया आणि नरवानात अमित शहा यांची रॅली रद्द करण्यात आल्या होत्या. या ठिकाणी भाजपला केवळ रतिया या ठिकाणी विजय मिळाला आहे. टोहानात भाजपचे अध्यक्ष सुभाष बराला यांचा पराभव झाला आहे.
