पुणे: सोमवारी रात्रीपासून पावसाने राज्यातील विविध ठिकाणी हजेरी लावली. , अहमदनगरमध्येदेखील पावसाने हजेरी लावली. पुण्यातील काही इमारतींच्या आवारात पावसाचे पाणी घुसल्यामुळे घरांचे नुकसान झाले आहे. तर अहमदनगरमधील मुळा धरण पाणलोट क्षेत्रात जोरदार पाऊस झाल्याने धरणाचे ११ दरवाजे उघडले आहेत. मुसळधार पावसामुळे पुण्यातील काही ठिकाणचे जनजीवन विस्कळीत झाले आहे. लोहगाव जकात नाक्याजवळ एका खाजगी कंपनीची बस पाण्यात अडकली. या बसमध्ये जवळपास २० कर्मचारी असल्याची माहिती आहे. अग्निशमन दलाच्या जवानांकडून बचाव कार्य सुरू असून कर्मचाऱ्यांना बसमधून बाहेर काढण्याचे प्रयत्न सुरू आहेत. पुण्यात मध्यरात्री झालेल्या पावसामुळे येरवडा-शांतीनगर, घोरपडी गाव, वानवी-आझादनगर, बी.टी. कवडे रोड, पद्मावती, मार्केड यार्ड येथे घरामध्ये पाणी शिरले. बचाव कार्यासाठी अग्निशमन दलाची मदत घेण्यात आली. पद्मावती येथील गुरुराज सोसायटीमध्ये आज पहाटे पुन्हा पाणी घुसले. पाच इमारतीच्या तळमजल्यावरील सदनिकांचे यामुळे पुन्हा नुकसान झाले आहे. सोसायटीची सीमा भिंत या आधीच्या पावसात कोसळली होती. सीमा भिंत कोसळलेल्या ठिकाणातून पाणी पुन्हा सोसायटीत शिरले. आंबिल ओढ्याच्या पाणी पातळीत पावसामुळे वाढ झाली. कात्रज, नवीन वसाहत पाण्याचा प्रवाह तयार झाला आहे. अहमदनगरमधील मुळा धरणाचे ११ दरवाजे उघडण्यात आले आहेत. या धरणातून ११०० क्यूसेस वेगाने मुळा नदीत पाण्याचा विसर्ग करण्यात येत आहे. धरणाच्या पाणलोट क्षेत्रात पाऊस सुरू असून धरणामध्ये सध्या ५६१ क्यूसेसने पाण्याची आवक होत आहे.
