मुंबई शिवसेनेचा मुख्यमंत्री होणार हीच महाराष्ट्रासाठी 'गोड बातमी', असल्याचं नमूद करत 'सामना'च्या अग्रलेखातून सुधीर मुनगंटीवार यांच्या विधानाचा समाचार घेण्यात आला आहे. सत्ता स्थापनेसंदर्भात कुठल्याही क्षणी गोड बातमी येईल, असे विधान सुधीर मुनगंटीवार यांनी केले होते. मुनगंटीवारांच्या या वक्तव्याला प्रत्युत्तर देताना शिवसेनेने महाराष्ट्राच्या नशिबात एक स्वाभिमानी सरकार येणार आहे तसे भाग्य मराठी जनतेच्या ललाटी लिहिले आहे. ती भाग्यरेषा पुसण्याची ताकद कुणाच्यातही नाही, असे म्हटले आहे. यासोबतच भाजपकडून होणाऱ्या फोडाफोडीच्या राजकारणावरही भाष्य करण्यात आले आहे. औटघटकेच्या सत्तेचा वापर करून फोड झोड करणार असेल तर त्या बाटग्यांना जनता सोडणार नाही. बाटगा जोरात बांग देत असतो असा काहीसा प्रकार सत्ता स्थापनेच्या निमित्ताने सुरू झाला आहे. ही राजकीय झुंडशाही महाराष्ट्राच्या, शिवरायांच्या परंपरेस शोभणारी नाही, असे शिवसेनेने म्हटले आहे. 'सामना'च्या अग्रलेखातील महत्त्वाचे मुद्दे... >> 'गोड बातम्यां'चे कितीही दाखले दिले तरी 'पाळणा' हलणार का? तो कसा हलेल? हे प्रश्न आहेतच. आता महाराष्ट्राच्या दृष्टीने एकच गोड बातमी अपेक्षित आहे ती म्हणजे, 'शिवसेनेचा' मुख्यमंत्री शपथ ग्रहण करणार आहे. >> भारतीय जनता पक्ष चर्चेचा दरवाजा बंद करून बसलेला नाही हे वाक्य सध्या फेकले जात आहे. आम्हीही दरवाजे, खिडक्या उघड्याच ठेवल्या आहेत व हवा खेळती ठेवली आहे इतकेच. >> ज्यांचा भारतीय जनता पक्षाशी, हिंदुत्व वगैरे विचारधारशी काडीचा संबंध नाही असे काही 'बाटगे' नव्या आमदारांशी संपर्क करून 'थैली'ची भाषा करत असल्याच्या तक्रारी वाढू लागल्या आहेत. >> दिल्लीत अहमद पटेल व केंद्रीय मंत्री नितीन गडकरी यांची गुप्त भेट झाली. त्यात काही वेगळी खलबते झाली असे मीडियाने वृत्त पसरवले आहे. उद्या गडकरी व अन्य पुढाऱ्यांच्या भेटीगाठी झाल्या तरी महाराष्ट्राचे पानही सळसळणार नाही. >> नैतिक मूल्यांवर जर राजकारण आधारले नाही, तर अन्याय भ्रष्टाचार आणि अत्याचार यांना राजकारणाचे संरक्षण मिळतच राहणार. महाराष्ट्राची प्रतिष्ठा धुळीस मिळवून कुणालाही राज्य आणता येणार नाही.
