नवी दिल्लीः भारताच्या सैन्य दलांमध्ये उच्च दर्जाची शिस्त, धर्मनिरपेक्षता आणि मानवी अधिकारांचा पूरेपूर आदर केला जातो, असं लष्कर प्रमुख बिपीन रावत म्हणाले. माणुसकी आणि सभ्यता हा सैन्य दलांचा आत्मा आहे, असंही रावत यांनी सांगितलं. दिल्लीतील राष्ट्रीय मानव अधिकार आयोगातील अधिकारी आणि कर्मचाऱ्यांना लष्कर प्रमुखांनी शुक्रवारी संबोधित केलं. भारतीय सैन्य दलात प्रत्येकाच्या मानवी अधिकारांचं संरक्षण केलं जातं. एवढचं नव्हे तर युद्ध बंदींच्या बाबतीही मानवतेचा विचार केला जातो, असं जनरल बिपीन रावत यांनी स्पष्ट केलं. दहशतवादाविरोधीतील मोहीमा या अतिशय आव्हानात्मक आणि अवघड असतात. दहशतवाद्याविरोधातील कारवाईवेळी नागरिकांना सुरक्षित ठेवूनच पुढचं पाऊल टाकलं जातं. कारवाईत फक्त दहशतवाद्यांनाच लक्ष्य केंल जातं. निपराध नागरिकांचे प्राण जाणार नाही, याची पूर्ण दक्षता आम्ही घेतो. शिवाय ज्या काही चुकीच्या घटना घडतात त्यांच्या चौकशीचे, कोर्ट मार्शलचे आणि प्रत्येक मोहीमांचे रेकॉर्ड सांभाळून ठेवले जातात. या मागे फक्त मानवता हाच दृष्टीकोन असतो, असं रावत म्हणाले. लष्करातील पोलीस विभागात महिला जवानांची भरती करण्याचा निर्णय लष्कराने ऑक्टोबरमध्ये घेतला. जमाव नियंत्रित करणे आणि दहशतवादाने होरपळणाऱ्या काश्मीरमध्ये आंदोलक महिलांना अटकाव करण्यासाठी या महिला जवानांचा उपयोग होणार आहे. दहशतवादांविरोधातील शोध मोहीमांवेळी मानवाधिकारांचे उल्लंघन होणार नाही, याची दक्षता सतत घेतली जाते. लष्कराने ही परंपरा गेल्या कित्येक वर्षांपासून कायम ठेवली आहे, अशी माहिती लष्कर प्रमुख जनरल बिपीन रावत यांनी दिली.
