मुंबई: वेगवेगळ्या चवीच्या पेस्ट्रीज, कुकीज, चॉकलेटच्या असंख्य प्रकारांनी सजलेल्या बेकरी अन् भेटवस्तूंच्या अनेक प्रकारांनी बाजारपेठांमध्ये ख्रिसमसचा माहोल तयार झाला आहे. केक म्हटलं की, सर्वांच्या तोंडाला पाणी सुटतं. मग तो कोणत्याही प्रकारचा केक असो जोपर्यंत तो संपत नाही तोपर्यंत मन शांत होत नाही. तुम्हालाही घरी केक तयार करण्याची हौस असेल तर आज जाणून घेऊ या घरच्या घरी तयार करण्याची सोपी पाककृती. साखर आणि मैद्याशिवाय बनवण्यात येणाऱ्या केकची पाककृती पुढीलप्रमाणे... साहित्य: दोन वाट्या गव्हाचं पीठ, दीड वाटी गूळ, पाऊण वाटी बटर, पाऊण वाटी दही, अर्धा टीस्पून बेकिंग सोडा, दीड टीस्पून बेकिंग पावडर, अर्धा चमचा दालचिनी पावडर, अर्धा चमचा सुंठ पावडर, अर्धा चमचा व्हॅनिला इसेन्स, बदाम, अक्रोड, काजू, खजूर, मनुका, टूटी-फ्रुटी आवश्यकतेनुसार आणि फ्रुट ज्यूस कृती: सर्वात आधी बदाम, अक्रोड, काजू, खजूर, मनुका रात्रभर फ्रुट ज्यूसमध्ये भिजवून ठेवा. एका बाऊलमध्ये दही, बटर, बारीक करून घेतलेला गूळ एकत्र करून घ्या. त्यामध्ये व्हॅनिला इसेन्स घालून एकजीव करुन घ्या. नंतर दुसऱ्या भांड्यात गव्हाचं पीठ, बेकिंग सोडा, बेकिंग पावडर, दालचिनी पावडर, सुंठ पावडर एकत्र करून घ्या. हे मिश्रण गुळाच्या मिश्रणात थोडं-थोडं घाला. आता भिजवलेले ड्राय फ्रुट तयार बॅटरमध्ये मिक्स करा. एका भांड्याला बटर लावून घ्या. केकच्या भांड्यामध्ये तयार बॅटर ओता. त्यावर टूटी-फ्रुटी आणि ड्रायफ्रुट टाका. त्यानंतर हे भांडं गरम केलेल्या प्रेशर कुकरच्या मधोमध स्टँडवर ठेवा. त्यानंतर कुकरची शिट्टी आणि रिंग काढून टाका. हा केक ४० मिनिटांपर्यंत मंद आचेवर शिजवून घ्या. गॅस बंद केल्यानंतर टूथपिकच्या मदतीनं केक पूर्णपणे शिजला आहे की नाही हे तपासा. केक तयार झाल्यानंतर थंड होऊ द्या. थंड झाल्यानंतर केक चाकूच्या मदतीनं कापून घ्या. हेल्दी ख्रिसमस केक खाण्यासाठी तय्यार आहे. खास टीप्स - सुका मेवा, चेरी, जर्दाळू, खजूर, अंजीर एकत्र करून सफरचंदच्या ज्यूसमध्ये दोन तास भिजत ठेवावे. - मैदा, सोडा व बेकिंग पावडरसहित इतर मसाले चाळून घ्यावेत. - केक टिनमध्ये तूप व मैदा लावूनच मिश्रण टाकावे. - फ्रूट केक कमाल १६० तर किमान ३० डिग्री तापमानावर बेक करावे. तसंच, 'ख्रिसमससाठी विविध फ्लेवरचे आणि लज्जतदार केक बाजारमध्ये उपलब्ध आहेत. त्यामध्ये प्लम केक, ब्लॅक फॉरेस्ट, पाइनअॅपल, रेड वेलवेट, झेब्रा, ब्राऊनी स्वेअर, कोकीज चॉकलेट अशा प्रकारचे केक उपलब्ध असून केकमध्ये प्लम केकची सर्वांत जास्त मागणी आहे. ख्रिस्ती बांधवामध्ये बनाना ब्रेड, कप केक्स, चॉकलेट मूस, चॉकलेट मिंट पॅन्डी, स्विस रोल्स विथ चॉकलेट, प्लम केक, न्यूरिअस, मार्श मेलो, जिजुक्स, जेली, चेरी, मर्जिपॅन, लॉलिपॉप, कूकूलस, स्मोबॉल, रोज-डे कुकीज, कुटलेल्या बदामाचा लगदा, डेटरोल, वॉलनट पॅज, आणि मिल्कक्रिम आदी पदार्थांनाही पसंती दिली जाते.
