मुंबई शिवसेनेकडे असलेलं राज्याचं गृहमंत्रिपद राज्याच्या मंत्रिमंडळ विस्तारात राष्ट्रवादीकडे जाण्याची शक्यता आहे. याबाबत महाविकास आघाडीत एकमत झाल्याचीही माहिती समोर आली आहे. सेनेच्या या निर्णयानंतर भाजपचे प्रदेशाध्यक्ष चंद्रकांत पाटील यांनी मुख्यमंत्री उद्धव ठाकरे यांना एक सल्ला देऊ केला आहे. 'शिवसेनेने गृहमंत्रिपद राष्ट्रवादी काँग्रेसला देऊ नये, नाहीतर मातोश्रीवर देखील कॅमेरे लागतील', असं चंद्रकांत पाटील म्हणाले. अर्थखातं, महसूल विभाग, सार्वजनिक बांधकाम विभाग आणि आता गृहखातं पण शिवसेनेने दिलं, मग यांनी स्वत:कडे ठेवलं काय फक्त मुख्यमंत्रिपद?, असा खोचक सवाल देखील चंद्रकात पाटील यांनी उपस्थित केला. महाविकास आघाडीचा मंत्रिमंडळ विस्तार आणि शपथविधी ३० डिसेंबर रोजी होणार असल्याचं सांगण्यात आलं आहे. यात शिवसेना आणि राष्ट्रवादीचे प्रत्येकी १३ मंत्री शपथ घेणार आहेत. तर काँग्रेसकडून १० आमदार मंत्रिपदाची शपथ घेणार असल्याचं बोललं जात आहे. दरम्यान, २८ नोव्हेंबर रोजी मुख्यमंत्री उद्धव ठाकरे यांच्यासोबत सुभाष देसाई, एकनाथ शिंदे, छगन भुजबळ, जयंत पाटील, बाळासाहेब थोरात आणि नितीन राऊत यांनी शिवाजी पार्क येथे कॅबिनेट मंत्रिपदाची शपथ घेतली होती. सध्या राज्याचं गृहमंत्रिपद एकनाथ शिंदे यांच्याकडे असून ते मंत्रिमंडळ विस्तारात राष्ट्रवादीकडे जाण्याची दाट शक्यता आहे. यासाठी अजित पवार, दिलीप वळसे पाटील आणि जयंत पाटील यांची नावं चर्चेत आहेत.
