कल्याण: आंबिवली स्थानकाजवळ लेव्हल क्रॉसिंग करत असताना एका डंबरने रेल्वे गेटला धडक दिल्याने ओव्हरहेड वायरचा विद्युतपुरवठा खंडीत झाल्याने मध्य रेल्वेची वाहतूक काही काळासाठी ठप्प झाली होती. मात्र, ओव्हरहेड वायरच्या दुरुस्तीचे काम पूर्ण झाल्यानंतर ही वाहतूक सुरू करण्यात आली. असे असले तरी मध्य रेल्वेची वाहतूक अत्यंत धीम्या गतीने सुरू आहे.
ही घटना आज पहाटे ५ वाजण्याच्या सुमारास घडली. लेव्हल क्रॉसिंग करत असताना एका डंपरने रेल्वे गेटला धडक दिली. यावेळी ओव्हरहेड वायरचा खांबाला धडक बसून विद्युत पुरवठा खंडित झाला होता. तातडीने ओव्हरहेड वायरच्या दुरुस्तीचे काम हाती घेत ते दुरुस्त करण्यात आले. असे असले तरी याचा फटका रेल्वे वाहतुकीवर बसला असून, मध्य रेल्वेची वाहतूक सुमारे पाऊणतास उशिराने होत असल्याचे सांगण्यात येत आहे. या घटनेचा परिणाम लांब पल्ल्याच्या एक्स्प्रेस गाड्यांवर देखील झाला. दरम्यानच्या काळात मुंबईच्या दिशेने येणाऱ्या पंचवटी एक्स्प्रेस, राज्यराणी, पंजाब मेल अशा गाड्या खोळंबल्या. ओव्हरहेड वायरच्या दुरुस्तीसाठी रेल्वेने अर्धा तासाचा ब्लॉक घेतला होता. या दरम्यान ही दुरुस्ती करण्यात आली.
